Gerîlayên YJA-Starê Doga Pîrdogan û Nûjiyan Sîncar ku di dîrokên cûda de li çiyayên Kurdistanê şehîd bûne li du merasîmên cûda de hatin bîranîn û xêra wan hate dayîn. Di merasîmê de ji fermandarên YBŞ û YJŞ’ê jî tevlîbûna merasîman çêbû û soza bicîhanîna xeyalên şehîdan hate dayîn.
Merasîmên şehîdan bi amadebûna saziyên Rêveberiya Xweser a Şengalê, Rêxistinên Ciwanan, Komîteya Malbatên Şehîdan, şervan û fermandarên YBŞ-YJŞ’ê bi deqîqeyek rêzgirtin destpê kir.
Di merasîmê de dayîkên Êzidî ji bo şehîdan çira vêxistin û paşê jî axaftin hatin kirin. Merasîm û xêra şehîd Doga Pîrdogan li Xanesora Şengalê û şehîd Nûjiyan Sîncar jî li Borikê pêkhat. Konê sersaxiyê ku sê roje hatibû danîn, îro bi merasîmeke girseyî û dayîna xêra şehîdan bi dawî bû.
Li Xanesorê Endama Fermandariya YJŞ’ê Viyan Hebabî axivî û sersaxî ji malbatên şehîdan re xwest.
Hebabî wiha behsa şehîdan kir: “Dîroka me tijî fermane û herdem ferman li ser civaka me hatine kirin. Lê ji niha û şûn de tu kes nikare civaka me ji xwe re bike kole û kengî bixwaze fermanê li ser me pêk bîne. Di baweriya me ya Êzidî de kesê ku li ser ol û baweriya xwe canê xwe bide, şehîd û pîroz e. Van hevalên me yên ku dibin şehîd bê dudilî canê xwe ji bo civaka xwe didin û wan xwe ji xweliyê fermanê ava kirine. Divê gelê me bizanibe ku ev ciwan ji bo parastina vê civakê canê xwe feda dikin. Êdî em gihîştine wê baweriyê ku eger em xwe bi xwe neparêzin tu kesek parastina me nake. Ma yên ku di dema fermanê de digotin emê we biparêzin, her kesî jî dît ka çi bi serê gelê me de anîn. Ji bo ku ev ferman careke din dubare nebe, divê em li zarokên xwe yên di nava tekoşînê de xwedî derkevin û hêzên xwe mezin bikin.“
Viyan Hebabî behsa ked û têkoşîna şehîd Doga kir û got: “Hevala Doga, li Şengalê xwedî kedeke diyar bû û di xebatên rêxistinkirina gel de jî cih girt. Em li ser şopa wanin. Hevala Doga yek ji wan lehengên serhildêre ku di dîroka gelê me yê Êzidî de bi destê xwe navê xwe nivîsandiye û heta civaka me ya Êzidî hebe ewê Hevala Doga ji bîr neke.“
Her wiha piştre bawernameya şehadetê hate xwendin û radestî dayîka Şehîd Doga, Dayê Fatma, hate kirin. Dayê Fatma spasiya civaka Êzidî kir ku ji dema şehadeta keça wê hatiye ragihandin heta niha li kêleka wan bûne.
Li Borikê jî bi navê li ser navê YJŞ’ê Sozdar Agir û Dayê Pakîz axivîn. Piştre bawernameya şehîd Nûjiyan Sîncar ji bo malbata şehîd hate dayîn.
Piştî axaftinan li ser jiyan û têkoşîna herdu şehîdan sînevîzyon hatin nîşandan û dirûşmeyên ‘Şehîd namirin’ hate berzkirin..
