Li Tirkiyeyê di demên dawîn de binpêkirinên mafan, êşkence û zext li gelek girtîgehan her ku diçe zêde dibin û berdewam dikin. Li Girtîgeha Bolûyê di gel ku tehliyekirina gelek girtiyan hatiye taloqkirin jî hin binpêkirinên mafan ên nû rû dane.
Derket holê ku gule danîne hewşa Girtîgeha Girtî ya Tîpa S a li navçeya Çarşamba ya Samsûnê ku girtiyê siyasî Giyasettîn Aydin li vir tê rehîngirtin. Aydin beriya niha jî gelek caran bi zext û gefên gardiyanan re rû bi rû mabû.
Her wiha girtiyê bi navê Emre Can Demîr ê li Girtîgeha Tîpa S a Kavakê, ji ber ku lêgerîna nava dev qebûl nekiriye, rastî êrîşa gardiyanan hatiye. Hate ragihandin ku piştî êrîşê rêveberiya girtîgehê hemû çalakiyên werzîşê qedexe kirine.
Malbatên girtiyan dan zanîn ku li Girtîgeha Tîpa S a Kavakê li blokên girtiyan faşîstên nijadperest hatine bicihkirin û diyar kirin ku tevahiya rojê gefa kuştinê li girtiyan tê xwarin, sirûdên nijadperest tên xwendin û bi gotina ‘’dema ku pêvajo bi dawî bû em ê we bikujin’’ gefên kuştinê li girtiyên siyasî tên xwarin.
