Li Navenda Civaka Kurd a li bajarê Toronto yê Kanadayê civîna gel hate lidarxistin. Hevserokê Kongreya Neteweyî ya Kurdistanê (KNK) Ahmet Karamus di civînê de axivî.
Civîn ji bo bîranîna şehîdên Kurdistanê bi deqeyek rêzgirtinê û piştre bi sirûda Ey Reqîb destpê kir. Hevserokên Navenda Civaka Kurd Pêngava 15’ê Tebaxê silav kirin. Di axaftinan de hate diyarkirin ku ruhê 15’ê Tebaxê li her cihê ku Kurdistanî lê dijîn tê hîskirin, gavên wê rojê hatine avêtin destkeftiyên roja îro afirandine û divê her kes xwedî li van nirxan derbikeve.
Ahmet Karamus fermandar Nûreddîn Sofî, Koçera Urfa û şervan Bextiyar Gabar ên ku şehadeta wan hate ragihandin, bi bîr anî. Karamus got, “Ew rûmeta gelê Kurdistanê ne. Divê em girêdayî têkoşîna wan bimînin û ji bo azadiya Kurdistanê divê her kes çi ji destê were, pêk bîne.”
Karamus têkildarî “Banga Aştî û Civaka Demokratîk” a ku Rêber Apo 27’ê Sibatê bi raya giştî re parve kirî, ev tişt got: “Em dizanin ku di navbera Kurdan û Tirkiyeyê de pêvajoyek didome. Ev pêvajo dibe ku bandorê li parçeyên din jî yên Kurdistanê bike. Tenê bi Bakurê Kurdistanê re sînordar namîne, wê bibe sedem ku parçeyên din jî statü qezenc bike. KNK ji bo avakirina van şert û mercan, dikare bi roleke girîng rabe.”
Civîn bi beşa pirs û bersivê bi dawî bû.
