Dûrxistina Serokê Baroya Stenbolê Îbrahîm Kaboglû û desteya rêveberiyê ji wezîfeyê, li Kurdistanê û Tirkiyeyê dibe sedema nerazîbûnan.
Serokê Baroya Amedê Abdulkadîr Guleç li ser mijarê axivî û got, “Baroya Stenbolê hema bibêjin baroya herî mezin a cîhanê ye. Di meha Cotmehê de hilbijartinên baroyê hatin kirin û Birêz Îbrahîm Kaboglû û rêveberî hate hilbijartin. Ji aliyê hin derdoran ve ev yek weke serketineke mezin hate nirxandin Em hemû Birêz Kaboglû nas dikin; hiqûqnasê destûra bingehîn e û demekê li parlamentê di Komîsyona Destûra Bingehîn de wezîfe kir. Zanyarekî cihê hurmetê ye.
Ji ber zanyar û akademîsyenekî bi vî rengî Baroya Stenbolê li gorî demên derbasbûyî ji aliyê mijarên binpêkirina mafên mirovan, serweriya hiqûqê, serxwebûna dadgerî û bêalîtiya wê ve karên gelekî girîng da ser xwe. Bi dîtina min ji ber parêzvaniya xwe ya ji bo mafên mirovan û serweriya hiqûqê hatin lînçkirin.
Baroya Stenbolê bi doznameya li Dadgeha Hiqûqê ya Asyayê di rûniştina duyemîn a Serdozgeriya Komarê de ji wezîfeyê hate dûrxistin. Cihê vê yekê di hiqûqê de nîne. Baroya Stenbolê parastina serweriya hiqûqê û têkoşîna li dijî binpêkirina mafên mirovan ji xwe re kir wezîfe û bi vî rengî tevgeriya. Ji ber vî karê xwe hate darizandin û ji wezîfeyê hate dûrxistin. Ev yek peyamek û çavtirsandineke ku desthilatdariya siyasî da.”
‘EV BIRYAR HILWEŞÎNA HIQÛQÊ YE’
Guleç dûrxistina Serokê Baroya Stenbolê û rêveberiyê ji wezîfeyê weke rûreşiya li dîroka hiqûqê nirxand û got, “Ev biryar deqeke reş a mezin e. Dema ku mirov bala xwe bidin ser Qanûna Parêzeriyê, tê dîtin ku Baroya Stenbolê ji ber ku wezîfeya çar bi çaran kir, ji wezîfeyê hate dûrxistin. Li gorî min, hukmê vê biryarê nîne.
Di dîrokê de zextên gelekî giran li Baroya Stenbolê hate kirin. Di darbeya 12’ê Îlonê de zextên gelekî giran hatin kirin û wê demê serokê baroyê hate girtin. Bi heman rengî zextên giran li Baroya Amedê jî hate kirin. Gelek baro ji ber ku hiqûqê diparêzin dibin hedefa zextên desthilatdariya siyasî. Serokê baroya me jî ji ber ku xwedî li hiqûqê derket û mafê aştiyê parast hate qetilkirin.”
‘EM NEÇAR IN XWEDÎ LI HIQÛQ Û DEMOKRASIYÊ DERKEVIN’
Abdulkadîr Guleç destnîşan kir ku li hemberî zextên desthilatdariya siyasî divê ew xwedî li hiqûq û demokrasiyê derkevin û got, “Ji bilî xwedîderketina li hiqûq û demokrasiyê şensekî me nîne. Ji bilî têkoşîna li hemberî binpêkirina mafên mirovan rêyeke me nîne. Li hemberî girtinên bi neheqî divê em bi rê û rêbazên hiqûqî û demokratîk têbikoşin.”
