Serokwekîla Koma Partiya Demokrasî û Wekheviyê ya Gelan (DEM Partî) Gulistan Kiliç Koçyîgît têkildarî bûyerên di rojevê de ye li Meclîsê civîn çapemeniyê lidar xist.
Gulistan Kiliç Koçyîgît bal kişand ser rapora meclîsê ya li ser pêvajoyê û anî ziman ku ev yek ji bo her kesî nexşerêyek e û pêwîstiyên qonaxa duyemîn a pêvajoyê destnîşan kiriye.
Gulistan Kiliç Koçyîgît got, “Rojeva sereke ya civakê ev mesele ye. Bêguman divê bibe yek ji rojevên sereke yên saziya siyasetê.”
Serokwekîla Koma DEM Partiyê anî ziman ku gavên şênber ên ku lîderê MHP’ê Devlet Bahçelî ji bo pêvajoyê pêşniyar kir, girîng e û axaftina xwe bi vî rengî dewam kir: “Di serî de birêz Ocalan û hemû muxatab ji bo pêşvebirina pêvajoyê di nava hewldanan de ne. Ji bo pêşveçûna pêvajoyê divê Meclîs jî berpirsyariya xwe bi cih bîne. Pêdiviya aştiyê bi hiqûqê heye. Li gorî rapora hevpar a Komîsyona Meclîsê divê pêvajoya çêkirina qanûnan dest pê bike. Ji Meclîsê, saziyên siyasî û desthilat ji bo pêşvebirina pêvajoyê divê di nava hewldanan de bin. Çavê raya giştî li Meclîsê, desthilatê û çêkirina qanûnan e. Her gaveke qanûnî ku ji bo pêvajoyê bê avêtin dê bibe misogeriya demokrasiyê. Ji bo avêtina gavên qanûnî hewceyî bi wêrekiyê heye. Bi avêtina van gavan hemû kes dikare sûdê werbigire. Weke DEM Partiyê em jî amade ne ku berpirsyariyên xwe bi cih bînin. Êdî ne dema gotinan e lê dema pratîkê ye.”
