Serokwekîla Koma DEM Partiyê Gulistan Kiliç Koçyigit li parlamentê civîneke çapemeniyê lidar xist.
Gulistan Kiliç Koçyigit ji pratîkên rant û talankirinê yên desthilatê bigirin heta êrîşên li ser azadî û mafên bingehîn, ji desteserkirina şaredariyan bi rêya qeyûman heta pirsgirêka Kurd, gelek mijar nirxand.
Gulistan Kiliç Koçyîgît têkoşîna li ser navê çareseriya demokratîk a ji bo pirsgirêka Kurd bi bîr xist û wiha axivî: “Ji bo nîqaşkirina vê meseleyê em li 42 bajaran bi gel re hatin ba hev. Me agahiyên xwe bi gel re parve kirin. Divê em diyar bikin ku hêviya gelê me ya ji bo aştiyê gelek xurt e.”
Gulistan Kiliç Koçyîgît diyar kir ku êdî gel hatiye wê rewşê ku serî hilde û daxwaza afirandina atmosfereke aştiyê ya gel anî ziman.
Koçyîgît wiha pê de çû: “Demokrasî bêyî aştiyê nabe. Her kesî ev yek hem di civînên me de hem jî di hevdîtinên me de anî ziman. Şertê ewil ê demokrasiyê aştî ye û rêya aştiyê ji çareseriya demokratîk a pirsgirêka Kurd derbas dibe. Em ê her tim hewl bidin vê rastiyê dubare bikin.”
Gulistan Kiliç Koçyîgît anî ziman ku gel bi kelecan li benda daxuyaniya dîrokî ya Rêber Apo ye û got: “Di vê rewşê de berpirsiyarî ne tenê ya me ye; ji bo bicihbûna aşîtiyê di nav civakê de û piştgirîdayîna pêvajoyê navnîşana sereke Parlamento ye. Em ji vir careke din bang dikin ku Parlamento demildest erka xwe bi cih bîne.”
Koçyîgît herî dawî bang li partiya sereke ya muxalefetê jî kir ku ew jî bibe alîgirê çareseriyê û got: “Ji bo avakirina aşîtiyeke ku em ê hemû jê sûd wergirin, divê em hemê mil bidin hevdu û bi hev re bixebitin.”
Gulistan Kiliç Koçyîgît herî dawî êrîşên dewleta Tirk ên li ser rojnamevanan şermezar kir û axaftina xwe wiha bi dawî anî: “Herî dawî Azîz Koyluoglû bi êrîşa SIHA’yê hat qetilkirin. Divê em hemû bi hev re li dijî vê feraseta ku mafê jiyanê binpê dike bisekinin.”
