Parlamentera Mêrdînê ya DEM Partiyê Bêrîtan Guneş xitimîna pêvajoya Aştî û Civaka Demokratîk ji ANF’ê re nirxand û anî ziman ku meseleya Kurd ne ew mesele ye ku bi taktîka mijûlkirinê bê taloqkirin. Guneş destnîşan kir ku divê siyaseta Tirk aliyekî ji xwe re hilbijêre.
‘LI PÊŞBERÎ BERXWEDANA GELÊ KURD MIRIN JÎ BI KÊR NEHAT, NE TENÊ MIJÛLKIRIN’
Bêrîtan Guneş bi gotina, “Meseleya Kur dne meseleyeke welê ye ku bi taktîka mijûlkirinê bê derbaskirin” dest bi nirxandina xwe kir û destnîşan kir ku herî zêde dewlet bi vê rastiyê zane. Bêrîtan Guneş got, “Ev gel sed sal e li dijî înkar, zext, mirin, şewitandina gundan û her cûreyên zilmê li ber xwe dide. Li pêşberî berxwedana vî gelî mirin bi kêr nehat, ne tenê mijûlkirin. Herî zêde dewleta Komara Tirkiyeyê bi dilsoziya gelê Kurd a li îrade û nasnameya xwe zane. Lewma eger nêtek ji bo mijûlkirinê hebe, ev yek dûrî cidiyetê ye. Ev yek hem di nêzîkatiya li meseleya Kurd de hem jî di nêzîkatiya li gelên Tirkiyeyê û dewletê bi xwe de bêcidiyetî ye. Tê zanîn, ku li Rojhilata Navîn dewletên ku meseleya Kurd çareser nekin wê bi xwe ji hev bikeve.”
‘SERKETINA PÊVAJOYÊ WÊ BIBE DESTKETIYA GELAN HEMÛYAN’
Guneş ragihand ku pêvajo xwedî wê îdîayê ye ku rûmet û hesasiyeta gelan biparêze, lewma serketina vê pêvajoyê ji bo Tirkan, ji bo Kurdan û ji bo hemû gelên li Tirkiyeyê wê bibe destketî. Guneş bi bîr xist ku rûbirûbûna li komkujiyan wê ji bo her kesî bibe destketiyek û axaftina xwe bi vî rengî dewam kir, “Di komkujiya Vartinisê de şewitandina pitika di zikê dayika xwe de gelo zerar neda rûmeta gelên Tirkiyeyê? Yan jî şewitandina gundan, kuştina zarokan, înkarkirina zimanekî gelo tenê destwerdana li rûmeta gelê Kurd tê dîtin? Ev komkujî û zilm ne tenê li gelê Kurd hate kirin, di heman demê de bêrûmetî û êrişek li hemberî wijdanê mirovahiyê, mirovahiyê û gelan hemûyan hate kirin. Lewma pêvajoya heyî ne tenê ji bo jiyaneke bi rûmet a gelê Kurd e, her wiha hewldanek ji bo parastina gelan, baweriyan, nasname û zimanên li Tirkiyeyê li ser zemîneke demokratîk, azad, wekhev û bi rûmet e.”
Bêrîtan Guneş got, desthilatdariyê dît ku paradîgmaya Abdullah Ocalan dikare Tirkiyeyê bike yek, Tirkiyeyê xurt bike, ji şerê li Rojhilata Navîn rizgar bike, lewma vê pêvajoyê destpê kir û got, “Sedema guherîna Devlet Bahçelî ku berê werîsê darvekirinê nîşan dida, hêza li paradîgmaya Birêz Abdullah Ocalan e, hêza wî ya çareserî û guhertinê ye. Lewma divê kes ji vê hêzê netirse. Ev hêz ne ew zemîn e ku pêşî lê bê girtin, berevajî vê yekê divê pêşî lê bê vekirin, li nuqteyeke welê be ku derfetên avakirina jiyaneke bi rûmet û paşeroja gelan dewlemend bike, lê beriya her tiştî dewleta Komara Tirkiyeyê û yên şertên muzakereyê diafirînin xwe ji fobiya Kurdan rizgar bikin.”
‘HERÎ ZÊDE DIVÊ SIYASET ALIYÊ XWE DIYAR BIKE’
Guneş anî ziman ku di vê mijarê de Rêberê Gelê Kurd Abdullah Ocalan baş dibîne bê “hêzên norm û hêzên derveyî norm” di siyaseta Tirkiyeyê û rojeva wê de dikarin bibin sedema çi û got, “Hêza li derveyî normê çi ye? Yên ne li gorî destûra bingehîn e, yên ne li gorî herikîna jiyanê ne, ne li gorî jiyana gelan e. Ev rewş ne tenê di dema şer de derdikeve holê. Hêza li derveyî normê ew feraset e ku hêza dewletê li gorî xwe bi kar tîne. Em îro di kuştina Gulistan Dokû de li vê hêza li derveyî normê rast tên. Em dibînin bê waliyek hêza xwe çawa organîze kiriye, bi kar aniye, dozek, bajarek, kuştinek 6 salan di tarîtiyê de hiştiye û di vir de jî bi ser ketiye. Ev ne tenê serketina waliyekî ye. Ev serketina hêzên li derveyî normê ye. Lê belê roj tê tarîtî ronî dibe. Ji ber ku norm rojekê ji her kesî re lazim e. Rojekê edalet û demokrasî ji her kesî re lazim e. Pêwîstî bi jiyana hevpar dibe. Di vir de her kes neçar e ku biryarê bide: Wê li aliyê alîgirên şer, kaos û bêhiqûqiyê be, yan jî li aliyê edalet, aştî û wekheviyê be? Di vir de divê herî zêde siyaset aliyê xwe hilbijêre û bi rastiyan re rû bi rû bibe.”
‘MESELEYA KURD ÇIQASÎ DÎROKÎ BE ÇARESERIYA WÊ JÎ DI HEMAN ASTÊ DE DIVÊ ÎROKÎ BE’
Guneş anî ziman ku ji bo avakirina aştiyê divê derbasî qonaxa duyemîn bibin û got, “Aştî li cihê ku ev mesele tine hate hesibandin, yanî li meclîsê divê ava bibe. Cihê ku pirsgirêka Kurd lê biqede yan jî asayî bibe, statu jê re bê dayin, demokratîk bibe meclîs bi xwe ye, qanûnên bêne derxistin e, zimanê siyasetê ye. Ji bo vê jî divê partiyên li meclîsê hemû bikevin bin bar û bi berpirsyariyê rabe.”
Bêrîtan Guneş destnîşan kir ku ev pêvajo pêvajoya her kesî ye û got, “Meseleya Kurd çiqasî dîrokî be çareseriya wê jî divê di heman astê de dîrokî be.”
