Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskin Bayindir, li dijî êrîşên ku HTŞ û komên paramîlîter ên bi piştgiriya Tirkiyeyê li Bakur û Rojhilatê Sûriyeyê pêk tînin, li Buroya Şêwirê ya Amedê ya Navenda Giştî daxuyaniyek dan.
Di destpêkê de Keskin Bayindir axivî û bal kişand ser êrîşên ku ev çend roj in li ser Bakur û Rojhilatê Sûriyeyê berdewam dikin. Bayindir destnîşan kir ku ji aliyê DAIŞ û HTŞ’ê ve planeke tunekirinê li ser gelê Kurd tê meşandin. Bayindir diyar kir ku Kurdên li her çar parçeyên Kurdistanê û cîhanê ji bo vê planê pûç bikin bi rojan e li ber xwe didin û wiha got:
“Îro li ser gelê Rojava metirsiyeke mezin heye. Banga me ji bo gelê Kurdistanê, Tirkiyeyê û Kurdên cîhanê ew e ku; em li dijî vê plana herêmî û neteweyî nerazîbûna xwe nîşan bidin û dakevin kolanan. Ji bo statuya Rojava û ji bo Sûriyeyeke demokratîk, em xwedî li statuya Rojava derkevin. Em xwedî li Sûriyeyeke demokratîk û azad derkevin. Em hişmendiya HTŞ’ê ji Kobanê û Şengalê nas dikin. Gelê Kurd bi salan e vê polîtîkayê dijî, lê gelê Kurd êdî polîtîkayên dagirkeriyê yên li Rojhilata Navîn qebûl nake, em jî qebûl nakin. Bi mîtîng û çalakiyan em bêdiliya xwe tînin ziman. Di televîzyonan de û bi rêya çapemeniyê statuya Rojava tê hedefgirtin. Statuya Rojava ne tenê hebûna gelê me yê li wir diyar dike; statuya Rojava wê pêşeroja gelên Rojhilata Navîn diyar bike.”
‘BI RUHÊ SEFERBERIYÊ TEVLÎ TÊKOŞÎNÊ BIBIN’
Bayindir da zanîn ku ev êrîş ne tenê ji aliyê hikûmeta Şamê ve tên kirin û bal kişand ser rola Tirkiye û hêzên herêmî. Bayindir got: “Plana Tirkiyeyê, hêzên herêmî û dewletan heye. Dixwazin statuya Rojava ya ku ji bo cîhanê bûye mînak, hedef bigirin. Ji ber vê yekê banga me ji bo gelê me yê hêja; ji vê saetê pê ve divê em ji bo pêşeroj û hebûna xwe baldar bin û di çalakiyê de bin. Werin em ji bo çalakiyan hemû derfetên xwe seferber bikin û bi ruhê seferberiyê tevlî têkoşînê bibin.”
