Di destpêkê de û beriya her tiştî ez komploya navneteweyî ya 15’ê Sibatê bi kîn û hêrs şermezar dikim, tevahî şehîdên vê rojê yên bi dirûşma, “Hûn nikarin roja me tarî bikin”, bi mînetdarî bi bîr tînim û bejna xwe li beramberî mezinahiya wan ditewînim. Ev zêdetirî çaryek sedsal e Rêber Apo di nav şert û mercên herî zor û zehmet de, li girava Îmraliyê tê ragirtin.
Dewleta Tirk a ku dijminê herî xedar û hov e, her bi rêbazên cur bi cur hewl daye gelê Kurd di qirkirina çandî û etnîkî re derbas bike. Ji bo vê jî timî bi rêbazên komployan tevgeriyane. Mînakên herî berbiçav jî komployên li hember Şêx Seîd, Seyîd Riza, Hesoyê Biroyê Têlî, Îhsan Nûrî Paşayê Bitlîsê û hwd. in. Serhildana Şêx Seîd li Amedê, serhildana Seyîd Riza li Dersimê, serhildana Agirîyê ya Biroyê Heskoyê Têlî û Îhsan Nûrî Paşa heya Komara Mahabadê ya di pêşengtiya Qazî Muhammed de bi tevahî tesfiye kirin.
Tesfiyekirina tevahî serhildanên gelê Kurd ên li çar hêlên Kurdistanê, parçeyek ji vê plana komploya desthilatdarên Tirk û hevkarên wan ên serwerên cîhanê ye. Jixwe li dû komkujiya Geliyê Zîlan digotin, “Kurdistana xeyalî li vir hatiye binaxkirin” û timî li hember gelê Kurdistanê komplo û komkujî berdewam kirine. Xwestine gelê Kurd bi temamî qir bikin û bidin jibîrkirin. Lê piştî ewqas komkujiyan ji gelê Kurd re rojeke nû hilat û bû hêviya serdemeke nû. Ew hesreta di dilê Kurdan de weke çiyayan lêhati bûye, bi hilatina wê rojê re gelê Kurd qîriya û doza xelasî û azadiya xwe kir. Bi rastî ew roja ku ji gelê Kurdistanê re nûhilat û bû ronahî, bi demê re Kurd kirin yekpare û şoreşek pir xurt da lidarxistin. Ev pêşengê serdema nû Rêber Apo bû. Rêber Apo Kurd gihandin pileya herî jor a pêşveçûna neteweyî. Rêber Apo ji gelê Kurd re rê li ber ronesansa sedsala 21’an vekir û xwe fedayî heqîqeta gelan kir. Gelê Kurd ji xewa giran şiyar kir. Rêber Apo xwest welatê xwe yê bedew di xweşikiya bihuşta baqî de ji tariya sedsalan rizgar bike û gelê xwe bigihîne asta pêşveçûna dîrokê.
Lê belê hêzên herî tundrew û dostên sexte yên ji mirovahiyê bêpar mane xwestin roja gelan tarî bikin û li hember Rêber Apo komploya navneteweyî ya 15’ê Sibatê pêş xistin. Weke tê zanîn Rêber Apo bi operasyoneke bêbext a navneteweyî bi serkêşiya NATO, MOSSAD, GLADÎO û CIA’yê dîl hat girtin. Mirov dikare bêje ku ji bo jinûve dîzaynkirina Rojhilata Navîn a projeyeke DYA’yê komployeke wisa nemerdane dan destpêkirin. Hewl dan di şexsê Rêber Apo de Tevgera Azadiyê û gelê Kurd tesfiye bikin da ku li hember wan ti astengî nemînin. Ji ber dizanîn ku tenê Rêber Apo li hemberî plan û projeyên wan ên destwerdana li ser Rojhilata Navîn dibe astengî.
Rêber Apo xwest ji gelê xwe re welatekî azad ava bike, lê mixabin ji hêla hêzên komploger û xiyanetkaran ve hate armancgirtin. Bi rêbazên herî bêpîvan û bêexlaq Rêber Apo dîl girtin û bi lezgînî wî radestî dewleta Tirk a dagirker kirin. Weke tê zanîn azadî pîvaneke xwezayî ya her zindiyên li ser rûyê cîhanê ye. Rêber Apo jî weke mafeke ji parçeyek xwezayê ye rêyeke herî zehmet hilbijart da ku rûmeta gelê xwe biparêze, wan azad bike. Lê hêzên serwerên cîhanê yên zalim ev ji bo gelê Kurd û Rêber Apo pir zêde dîtin.
Dema ku komplo li ser Rêber Apo dan meşandin heval Halît Oral bi şîara, “Hûn nikarin roja me tarî bikin” agir berda bedena xwe û komplo şermezar kir. Li pey wî jî gelek milîtanên Rêber Apo û mirovên welatparêz jî bedena xwe dan ber agir. Ez hevalê şehîd Halît Oral û tevahî şehîdên bi agirê bedena xwe xwestin Rêber Apo biparêzin, bi bîr tînim, bi hurmet bejna xwe li hemberî mezinahiya wan ditewînim, soza bilindkirina têkoşînê û azadiya fizîkî ya Rêber Apo didim. Wan qehremanan xwestin bi agirê bedena xwe ji hêzên komploger û ji dewleta Tirk re bêjin, “Hûn nikarin roja me tarî bikin” û li dora Rêber Apo bûn xelekek ji agir. Gelê Kurd rabû ser piyan û nehiştin komplo bigihîje armanca xwe. Rêber Apo gelekî wisa rêxistinkirî û perwerdekirî ava kir ku xwe nas kir û hebûna xwe di hebûna Rêber Apo dît. Ji ber wê zarok û ciwanên gelê Kurd gotin, “Kes nikare roja me tine bike û wê roja me neyê tinekirin.”
Weke heval Viyan Soran gotiye em ê ti carî nehêlin agirê ocaxa Rêber Apo sar bibe. Heya azadiya Rêber Apo mîsoger nebe û komplo têk neçe wê têkoşîn û berxwedana me berdewam bike. Girêdana me ya bi Rêber Apo re heya dawiyê wê bidome. Ez hêvidar im 15’ê Sibata 2025’an wê tarîtiyê biqelişîne, ronahiya azadiyê bi xwe re bîne.
