Bi boneya salvegera 33’yemîn a şehadeta Hozan Mizgîn (Gurbet Aydin), Desteya Çand û Hunerê ya Reqa û Tebqayê bi hevkariya Tevgera Çanda Jinan a Hîlala Zêrîn, bi dirûşma “Em ê bi ruhê 11’ê Gulanê û hunera şoreşgerî civaka demokratîk ava bikin û azadiya fîzîkî ya Rêber Abdullah Ocalan misoger bikin” rêzeçalakiyên hunerî û çandî li dar xistin.
Çalakiya girseyî li navenda çandê ya Reqayê, bi beşdariya nûnerên ji saziyên Rêveberiya Xweser, rewşenbîr, endamên Kombûna Jinan a Zenûbiya, pêk hat.
Di çalakiyê de hevseroka Desteya Çand û Şûnwaran a kantona Reqayê Lîlav Xelîl axivî û got şehîd Mizgîn sembola fedayî, moralên bilind û hezkiriya welat bû. Şehîd Mizgîn roleke pêşeng di aliyên civakî, leşkerî û çandî de lîst û dengê wê ruhê nasnameya Kurd û berxwedanê hilgirt û ji bo azadiya jinan û çanda demokratîk bû sembol.
Endama Koordînasyona Meclisa Kombûna Jinan a Zenûbiya Cîhan Mihemed li ser rêwîtî û têkoşîna hunerî ya şehîd Mizgîn axivî û got: “Mizgîn meşaleya pêketibû. Hunera xwe ji bo pêkanîna felsefeya jiyana azad kir û ji bo her jineke di oxira rûmet û azadiyê de têdikoşe bû mînak.”
Piştre li ser jiyana şehîd Mizgîn sînevîzyonek hat pêşkêşkirin û komên hunerî stranên niştîmanî pêşkêş kirin.
