Di rapora Human Rights Watch (HRW) de ku roja Sêşemê hate weşandin, hate gotin ku şîrketeke ewlekariyê ya Abu Dabi ji bo leşkerên paramîlîter ên Kolombiyayî tevlî Hêzên Piştevaniya Lezgîn (HPL) ên li Sûdanê bike, rol lîstiye.
Li Sûdanê ji Nîsana 2023’an û vir ve di navbera artêşa Sûdanê û hevkarê wê yê berê HPL de şerekî navxweyî diqewime û li gorî hin çavkaniyan zêdeyî 200 hezar kes di vî şerî de mirin. Ji ber şer bi milyonan mirov ji cih û warê xwe bûn. Neteweyên Yekbûyî jî krîza li Sûdanê weke “felaketa herî giran a mirovî ya li cîhanê” pênase kir.
Di rapora HRW’ê de hate gotin, “Ev rapor parçeyek ji delîlan e ku nîşan dide Îmaratê alîkariyal eşkerî ji HPL re kiriye.” Rêveberiya Abdu Dabi îdîayên navborî red dike.
Li gorî raporê, tora komkirina leşkerên paramîlîter ji aliyê Global Security Services Group (GSSG) a li Îmaratê û hin şîrketên li Kolombiya û Panamayê hate birêxistinkirin. HRW’ê ragihand ku GSSG xwedî wê erkê ye ku bi navê hikumeta Îmaratê bixebite, di nava malbata rêveber a welêt û rayedarên payebilind de xwedî têkiliyan e.
Ajansa Nûçeyan a Fransayê (AFP) meha Kanûnê lêkolînek weşandibû û diyar kiribû ku bi sedan leşkerên berê yên Kolombiyayî ji bo maeşekî zêde ber bi Sûdanê ve hatine veguhestin.
