Huseyîn Cevahîr, yek ji navên pêşeng ên nifşê 68’an û tevgera şoreşgerî ya Tirkiyeyê, di 55’emîn salvegera qetilkirina xwe de li ser gora xwe ya li Dersimê hat bîranîn. Di bîranîna ku gelek kes tevli bûn de, bal hat kişandin ser têkoşîna Cevahîr a ji bo azadî, wekhevî û sosyalizmê.
Parlementera DEM Partiyê ya Dersimê Ayten Kordu ku di merasîmê de axivî, diyar kir ku Huseyîn Cevahîr û ciwanên şoreşger ên wê serdemê bi berdêlên giran têkoşîna wekhevî û azadiyê meşandine. Kordu destnîşan kir ku rêya zindîhiştina ramanên wan, bi rêxistinbûna zêdetir û mezinkirina têkoşînê dibe.
Serokê Bajêr ê Partiya Sor (Kızıl Parti) a Dersimê Alî Avcioglu jî ku li ser navê partî û saziyên siyasî daxuyaniya hevpar xwend, anî ziman ku Cevahîr ji bo îdealekî Tirkiyeya serbixwe û sosyalîst têkoşiyaye. Avcioglu bal kişand ku divê îro polîtîkayên ku çareseriyê ji pirsgirêkên karker, kedkar û gelên bindest re bînin, werin pêşxistin.
Avcioglu her wiha Sînan Cemgîl, Kadir Manga û Alparslan Ozdogan ên ku di 31’ê Gulana 1971’ê de li Çiyayên Nurhakê jiyana xwe ji dest dabûn jî bi bîr anîn.
Bîranîna ku banga yekîtî û pişgirtiyê li rêxistinên şoreşger û sosyalîst hat kirin, piştî axaftinan bi dawî bû.
