Dewleta Tirk û komên wê yên çete, ku mehên dawî yên sala 2024’an kaosa li Sûriyeyê kûr bû ji xwe re kirin firsend, di 27’ê Mijdarê de Şehba, Til Rifet û Minbic dagir kirin. Di 8’ê Kanûnê de li ser Bendava Tişrînê û Pira Qereqozaxê dest bi êrişên bejahî û hewayî yên giran kirin.
Armanc tevizandina stratejîk a Rêveberiya Xweseriya Demokratîk a Bakur û Rojhilatê Sûriyeyê û dagirkirina herêmê bi temamî bû.
Li hemberî van êrişan ne tenê hêzên leşkerî, her wiha gel jî berxwedaneke dîrokî nîşan da. Di 8’ê Çileya 2025’an de bi banga Rêveberiya Xweser bi deh hezaran kes li gel bombardûmana giran û êrişên bi SÎHA’yan berê xwe dan Bendava Tişrînê. Konvoyên bi rê ketin hatin bombekirin, sivîl hatin qetilkirin, êriş li rojnamevan û kedkarên tenduristiyê hate kirin. Lê belê li gel van êrişan jî gel paşve gav neavêt; xwe gihand bendavê û dest bi berxwedaneke nobedê kir ku 118 rojan dewam bike.
Ji kantonên Firat, Cizîr, Tebqa, Reqa û Dêrazorê bi dena komên cuda di nava şert û mercên giran ên zivistanê de nobed dewr wergirtin. Berxwedan ne tenê xeteke parastinê bû di heman demê de sekneke siyasî û civakî bû.
Berxwedêran li gel sermaya zivistanê salvegera komploya navneteweyî ya 15’ê Sibatê ya li dijî Rêber Apo, Banga Aştî û Civaka Demokratîk a Rêber Apo ku di 27’ê Sibatê de kir, sala dehemîn a rizgarkirina Kobanê ji çeteyên DAÎŞ’ê, 8’ê Adarê Roja Jinên Kedkar ên Cîhanê, salvegera raperîna gelê Sûriyeyê ya 15’ê Adarê, Cejna Newrozê ya 21’ê Adarê, meha Remezanê û cejna wê li gel 4’ê Nîsanê rojbûna Rêber Apo di bin êrişan de li bendavê pêşwazî kirin.
Jin, ciwan, extiyar; Kurd, Ereb, Tirkmen, Suryan, Ermen; gelên herêmê hemû li dora îradeyeke hevpar li hev kom bûn.
Bi sedan caran êriş li ser berxwedanê hate kirin ku 8’ê Çileyê destpê kir û heta 5’ê Gulanê dewam kir. Li gel vê yekê jî ji Kantona Firatê 8 ji kantonên Tebqa, Reqa û Dêrazorê 7, ji Kantona Cizîrê jî 19 komên cuda tevlî berxwedana nobedê ya li bendavê bûn.
Di êrişan de rojnamevanek û 3 xebatkarên tenduristiyê jî di nav de herî kêm 24 sivîl hatin qetilkirin; 7 rojnamevan, 3 xebatkarên tenduristiyê jî di nav de zêdeyî 200 kes birîndar bûn.
Di 5’ê Gulana 2025’an de Rêveberiya Xweser ragihand ku berxwedan gihîşt armanca xwe û bi dawî bûye. Berxwedana Tişrînê planên dagirkeriyê hemû pûç kir û nîşanî cîhanê da ku gelên herêmê bi hev re dikarin têbikoşin.
Îro li gel ku salek di ser Berxweedana Tişrînê re derbas bûye, têkoşîna gelan hîn jî dewam dike. Di serî de dewleta Tirk a dagirker gefên êrişê yên HTŞ’ê yên li ser gelên herêmê û zextên siyasî dewam dikin. Lê belê hişmendiya berxwedana hevpar a li Tişrînê derkte holê hîn jî dewam dike.
Gelên herêmê dilsoziya xwe ya bi şehîdan dubare dikin û vê peyamê didin, “Ya ku me li Tişrînê parast ne tenê bendavek bû, jiyaneke azad û bi rûmet bû.”
Ji bajarên weke Kobanê, Cizîr, Tebqa, Reqa, Qamişlo, Amûdê, Hesekê û Dêrikê bi sedan kesî 8’ê Çileyê berê xwe dan Bendava Tişrînê ku şer lê giran bû.
