Netanyahu ragihand ku Îsraîl wê operasyonên xwe yên leşkerî yên li Lubnanê zêde bike. Netanyahu diyar kir ku tevî agirbesta 17’ê Nîsanê, êrîş wê bi armanca “têkbirina” Hîzbûllahê bên domandin.
Heman rojê artêşa Îsraîlê li Başûrê Lubnanê û herêma Bekaa ya li rojhilatê welêt, êrîşên xwe yên hewayî zêde kir.
ARTÊŞA ÎSRAÎLÊ BANG LI LEŞKERÊN CÎHGIR KIR
Li gorî saziya weşanê ya dewleta Îsraîlê, di çarçoveya amadekariyên berfirehkirina operasyonên li sînorê Lubnanê de, bang li leşkerên cîhgir kir ku car din bên ser wezîfeyê.
Di nûçeyê de hate diyarkirin ku leşkeran ferman girtiye ku tevlî yekîneyên cîhgir bibin.
LI SER BAŞÛRÊ LUBNANÊ BOMBEBARANA ZÊDE
Artêşa Îsraîlê sihara sêşemê jî bombebarana li ser herêmên cuda ya Başûrê Lubnanê, domand. Bi taybetî gelek gundên girêdayî navçeya Nebatiye bi topan hatin hedefgirtin.
Hat diyarkirin ku roja duşemê Îsraîlê zêdeyî 70 gund bombebaran kir. Di tevahiya şevê de jî êrîş hîn dijwartir bûn.
Hat ragihandin ku di êrîşên hewayî yên li ser bajarokê Maşgara ya li herêma Bekaa de jî herî kêm 12 kes mirin.
DSO: LI SER BINESAZIYA TENDURISTIYÊ ÊRÎŞ DIDOMIN
Dîrektorê Giştî yê Rêxistina Tenduristiyê ya Cîhanê (DSO) Tedros Adhanom Ghebreyesus piştî hevdîtina bi Wezîrê Tenduristiyê yê Lubnanê re êrîşên li ser binesaziya tenduristiyê şermezar kir.
Tedros diyar kir ku DSO wê piştgiriya ji bo xizmetên tenduristiyê bidomîne û bang li aliyan kir ku li gorî peymana agirbestê tevbigerin.
HERÎ KÊM 116 XEBATKARÊN TENDURISTIYÊ HATIN QETILKIRIN
Wezîrê Tenduristiyê yê Lubnanê Rakan Nasreddîn beriya hefteyekî bi Serokê DSO’yê re hevdîtin kir û ragihandibû ku ji 2’yê Adarê û vir ve ji ber êrîşên Îsraîlê 116 xebatkarên tenduristiyê jiyana xwe ji dest dan.
