Di deklarasyonê de ya bi sernavê “Ji bo Abdullah Ocalan Mafê Hêviyê yê Navneteweyî” hate gotin, “Em bang li hêzên pêşverû, sekuler û demokratîk ên li cîhanê dikin ku guh bidin Ocalan.”
Deklarasyon li gel Heyeta Îmraliyê ji nûneriyên pêwendîdar ên Komîseriya Mafên Mirovan a Konseya Ewropayê, Komîsyona Ewropayê û Parlamenta Ewropayê re hate ragihandin.
Deklarasyon bi vî rengî ye:
“Ocalan li ser bingeha yekîtiya dîrokî ya gelên Tirk, Kurd, Ereb û Fars azadbûyîneke neteweyî, demokratîk û aştiyane pêşniyar dike. Banga Ocalan ku tundiyê bi rengekî mutleq red dike, ji sînoran derbas dibe û li tevahiya cîhanê deng vedide.
PKK’ê xwe fesix kir û dawî li têkoşîna çekdarî anî. Şerê li Sûriyeyê bi banga Ocalan bi dawî bû û pêvajoya entegrasyonê destpê kir. Dem hatiye ku Mafê Hêviyê bi cih bê anîn ku lîderê Partiya Tevgera Neteweperest a li Tirkiyeyê Devlet Bahçelî jî bi dengekî bilind anî ziman. Divê Ocalan karibe bi rengekî azad bixebite û gelê Kurd jî karibe dengê lîderê xwe bibihîze. Em bang li hêzên pêşverû, sekuler û demokratîk ên li cîhanê dikin ku guh bidin Ocalan.”
YÊN KU BANG KIRIN
Di nava kesayetên ku mohra xwe danîne binê bangê ji qadên felsefe, teoriya siyasetê, sosyolojî û mafên mirovan gelek akademîsyen û aktîvîst jî hene.
Ramangerê Fransî Edgar Morin, Alain Badiou yê ku bi karên xwe yên li ser felsefeya siyasetê û ontolojiyê tê naskirin, Jacques Rancière yê ku bi teoriya xwe ya li ser estetîk û demokrasiyê naskirî ye, Axel Honneth ku nûnertiyê ji teoriya rexnegiriyê re dike, teorîsyenê postkolonyal Gayatri Spivak, Angela Davis ku yek ji nûnerên tevgera azadiya reşikan, fîlozofa siyasetê Nancy Fraser, ramangerê Sloven Slavoj Žižek, dîroknas Enzo Traverso, civaknas Craig Calhoun û xwediya Xelata Aştiyê ya Nobelê Jody Williams di nava wan kesayetan de ne ku mohra xwe danîne binê bangawaziyê.
Di nava lîsteyê de gelek nûnerên teolojiya rizgariyê, bîrdoziya Marksist, psikanalist, antropolog û zanyarên siyasetê hene.
