Di nava meha Adara îsal de, gelê Bakur û Rojhilatê Sûriyeyê, bi beşdariya Heyva Sor a Kurd û Rêveberiya Xweseriya Demokratîk beşa yekemîn a konvoyên alîkariyên mirovî ji herêma peravê re şandin. Konvoya ku ji 6 hezar paketên xwarinê, 2 hezar û 500 paketên madeyên paqijiyê û 350 ton ard pêk dihat, li mexdûrên komkujiyên li peravê hatin belavkirin.
Şêniyên herêma Bakur û Rojhilatê Sûriyeyê îro amadekariyên beşa duyemîn a alîkariyên mirovî ji bo şêniyên peravê re dikin. Konvoya alîkariyê ku ji 13 hezar û 500 paketên xwarinê, 11 hezar paketên madeyên xwarinê û 2 hezar û 500 paketên pêdiviyên tenduristiyê pêk tê, dê bi çavdêriya Rêveberiya Xweser û Heyva Sor a Kurd re werin şandin.
Li gorî aliyên têkildarî, konvoyên alîkariyan dê sibe (11 Nîsan) li deriyê Tebqa yê di navbera herêmên Rêveberiya Xweser û herêmên desthilata Şamê de kom bibin û roja din (Şemiyê) ber bi herêma peravê ve bi rê bikevin.
Di navbera 7-10’ê Adarê de komkujî li herêma perava Sûriyeyê de hatin kirin. Li gorî Navenda Çavdêriya Mafên Mirovan a Sûriyeyê (SOHR) di encamê de hezar û 676 kes hatin kuştin. SOHR’ê ragihand ku duh li Banyasê 4 jê jin 17 kes hatin înfazkirin.
