Rêxistina Nûdem a Amedekirin û Geşedanên Mirovî ya Astengdaran û Nivîsgeha Astengdaran a girêdayî Desteya Karûbarên Kedkaran a kantona Cizîrê der barê koçberên astengdar ên ku ji Tebqa û Reqa derbasî herêmê bûne, daxuyaniyek da.
Daxuyanî li dibistana Salih Ebdê ya Qamişloyê ku koçber lê hatine bicihkirin, bi zimanê Kurdî ji aliyê Endama Rêxistina Nûdem Mizgîn Osman ve û bi zimanê Erebî ji aliyê Endama Rêveberiya Rêxistina Nûdem Sîham Çolî ve hate xwendin.
Di daxuyaniyê de hate diyarkirin ku “Astengdar di şertên awarte yên ku welatê wan tê re derbas dibe, bi taybetî di pêla koçberiya dawîn de, bi pirsgirêkan re rû bi rû dimînin. Ev rewş bandorên giran li jiyana wan a rojane dike. Li cihê ku koçber lê dimînin rewş her roj dijwartir dibe, astengdar di warê tenduristî û mafan de di nava zehmetî û metirsiyan de ne.”
Di daxuyaniyê de pêwîstiyên astengdaran wiha hatin rêzkirin:
“Kesên astengdar hewcedarî prosedûrên cîrahî yên lezgîn, rêyên ku karibin tê re tevger bikin û amûrên bihîstinê.
Gelek astengdar hewcedarî destwerdanê lezgîn dibin û pêdiviya wan bi şopandineke rast û domdar heye. Ew di rewşa heyî de nayê peydakirin.Piştgiriya derûnî û civakî tune ye.
Ji bo peydarkirina van pêwîstiyan, ev xebat hatin pêşinyarkirin:
Divê cihên koçber lê dimînin bi hemû amûr û şertên pêwîst werin amadekirin.
Ji bo peydakirin xizmetên tenduristiyê yên taybet, divê tîmên bijîşkî yên pispor werin erkdarkirin.
Pêdivî pê heye ku tîmên piştgiriya psîkolojîk bêne amadekirin da ku pirsgirêkên wan dirûnî çareser bikin.
Divê siyasetên pejirandina koçberan werin vekolandin da ku maf û hewcedariyên taybet ên astengdaran werin destnîşankirin.
Di daxuyaniyê de ji bo parastin, lênerîna kesên astengdar li navendên koçberan banga destwerdaneke lezgîn hate kirin.
