Platforma Tenduristiyê ya Amedê ji bo Kobanê banga lezgîn a alîkariya mirovî û tibî kir

Platforma Tenduristiyê ya Amedê, têkildarê pirsgirêkên tendûristiyê yên li Kobanê tên jiyîn de li Şaxa SES’ê ya Amedê daxuyaniyek çapemeniyê da. Li eywana ku daxuyanî hat dayîn de pankartên “Li Rojava li dijî komkûjiya tê jiyîn em di nobeta mafê jiyanê de ne”, û “Tendurisî mafê gerdûnî ye, ji bo Kobanê alîkariya lezgînî ya tibbî” hatin daliqandin. Daxuyanî ji hêla endama Lijneya Rêvebiriya Odeya Bijîjkan Hîcran Îzcî Yildiz ve hat xwendin.
 
Hîcran Îzcî Yildiz, destnîşan kir ku dorpêça demdirêj û şert û mercên şer sivîlên li Kobanê dijîn bi krîzeke mirovî ya giran re rû bi rû hiştiye.
 
Hîcran Îzcî Yildiz, bal kişand ser wê yekê ku xizmetguzariya tenduristiyê li Kobanê gihîştiye asteke nebaş û diyar kir ku nexweşxaneyên li herêmê kêmasiyeke cidî ya derman û pêdiviyên bijîşkî dijîn. Hicran Îzcî Yildiz, diyar kir ku Nexweşxaneya Gel a Kobanê, saziya sereke ya tenduristiyê, tenê dikare rewşên lezgînî pêşwazî bike, emeliyatên bernamekirî hatine rawestandin û alavên bijîşkî ji ber qutbûna ceyranê bi piranî nayên bikaranîn.” Hîcran Îzcî Yildiz, her wiha destnîşan kir ku xizmetên radyolojî û laboratûvarê hema bêje bi tevahî hatine rawestandin.
 
Hicran Îzci Yildiz, diyar kir ku Nexweşxaneya Zayînê bi piranî ne li xizmetê ye û Nexweşxaneya Diyalîzê ji ber kêmbûna dermanên girîng bi xetereya girtinê re rû bi rû ye û teqez kir ku ji ber şert û mercên dorpêçkirinê veguhestina nexweşan ji bo navendên din ne gengaz e. Hicran Îzci Yildiz, diyar kir ku ev rewş rasterast gefê li mafê jiyanê dixwe, bi taybetî ji bo nexweşên kronîk.
 
Hîcran Îzcî Yildiz, destnîşan kir ku nifûsa navenda bajarê Kobanê ku beriya şer 120 hezar bû, bi koçberiyê re gihîştiye nêzîkî 250 hezarî û diyar kir ku binesaziya tenduristiyê ya heyî ji xizmetkirina vê nifûsê dûr e. Hicran Îzcî Yildiz, destnîşan kir ku astengiyên di gihîştina xwarin, ava paqij û ceyranê de tenduristiya giştî bi ciddî tehdît dikin, torên avê yên nexebitbar metirsiya nexweşiyên vegirtî zêde dikin û nebûna binesaziya ragihandinê hevrêzkirina xizmetên tenduristiyê hema hema ne mumkin dike.
 
Hîcran Îzcî Yildiz, destnîşan kir ku gihîştina tenduristiyê mafekî bingehîn ê mirovan e û teqez kir ku şer û dorpêçkirin nikare mafê tenduristiyê yê sivîlan ji holê rake. Hîcran Îzcî Yildiz, diyar kir ku bûyerên li Kobanê ne tenê ji hêla herêmî ve, di heman demê de ji hêla mafên mirovan ên navneteweyî û etîka bijîşkî ve jî qadeke berpirsiyariyek cidî temsîl dikin.
 
Hîcran Îzcî Yildiz, wiha dawî li axaftina xwe anî: “Mafê tendûristiyê gerdûnî ye. Paşguhkirina krîza mirovî ya li Kobanî dê bibe sedema felaketên tenduristiyê yên hîn girantir û windahiyên bêveger. Şer pirsgirêkek tenduristiya giştî ye.” Hîcran Îzcî Yildiz, da dawiya axaftina xwe de banga hevgirtinê li hemû kedkarên tenduristiyê, rêxistinên demokratîk ên girseyî û civaka navneteweyî kir.