Jinên Herêma Bakur û Rojhilatê Sûriyeyê bi wesîleyê 8’ê Adarê Roja Jinên Kedkar ên Cîhanê ji ANF’ê re axivîn û diyar kirin ku ji bo wan her roj mîna 8’ê Adarê ye.
Cîgira Hevserokatiya Meclîsa Rêveber a Kantona Cizîrê Hemrîn Elî, pêşî 8‘ê Adarê li tevahî jinên têkoşer û yên ku dilê wan ji bo azadiyê lê dide pîroz kir û wiha got: “Em di vê roja pîroz de herî zêde li xwediyê felsefeya Jin Jiyan Azadî Rêber Abdulllah Ocalan pîroz dikin. 8’ê Adarê ji bo me weke jin û bi teybet jinên Herêma Bakur û Rojhilatê Sûriyeyê rojeke vejînê ye. Jinên vê herêmê di her qadên civakê de cihê xwe girtin û berxwedaniyek bêhempa nîşan dan, ji ber wê jî her roj ji bo jinên têkoşer 8‘ê Adarê ye.”
Hemrîn Elî, diyar kir ku di 8‘ê Adarê de jin li hember tevahî siyasetên qirêj serê xwe rakire û got, “Ji wê rojê heta roja me ya îro berxwedaniya jin roj bi roj mezin dibe û digihêje asta serketinê. Ez dikarim bibêjim ku berdewamiya berxwedana wan jinên ku ji sitemkariyê re gotin na, jinên herêma Bakur û Rojhilatê Sûriyeyê ne. Çawa dirûşmeya ‘Jin Jiyan Azadî’ li nava tevahî jinên cîhanê belav bû, wê têkoşîna wê jî bi vî rengî di dilê her jinekê de were ava kirin. Di dawî de jî ez dixwazim bibêjim ku wê jinên herêma Bakur û Rojhilatê Sûriyeyê bi têkoşîna xwe, berxwedana jin bikin destanek ji tevahî cîhanê re.”
Nesma El Yas jî weke jinek ciwan 8‘ê Adarê li tevahî jinan pîroz kir û got: “8‘ê Adarê ji bo me rojek gelek pîroze. Em cehwera têkoşîna jin di her alî de di vê rojê de dibînin. Ji bo jin her roj 8‘ê Adarê ye. Di dawî de jî ez car din vê rojê li şehîdên pêşengên jin pîroz dikin û em destnîşan dikin ku rêya şehîdên xwe bişopînin û em doza ku ji bo wê canê xwe feda kirin, berdewam bikin.”
Rêvebera Akademiya Perwerede, Lêkolîn û Stratejiyê Henan Iniz, roja 8‘ê Adarê li tevahî jinên Kurdistanê û cîhanê pîroz kir û got, “Bi fikrê Rêber Apo yê li ser bingeha ‘Jin Jiyan Azadî’ re, me xwe nas kir. Berê me nedikarî vê rojê pîroz bikira. Ji ber ku mafên me hatibûn desteserkirin. Lê Rêber Apo ev zihniyet derbas kir û mafê jin misoger kir. Em jî niha bi felsefeya Jin Jiyan Azadî re vê rojê û tevahî rojên xwe pê ava dikin.”
Henan Iniz, diyar kir ku wê projeya xwe ya hevjiyana azad li tevahî cîhanê belav bikin da ku her jinek cewherê xwe nas bike û wiha pêde çû: “Jin piştî Şoreşa Rojava xwe di hemû qadên civakê de pêş xist û bû mînek ji jinên cîhanê re. Jin di Şoreşa Rojava de hem di qadên civakî hem jî di qadên leşkerî de seknek ava kir. Ev yek bû model. Ev siyaseta nû ya di Sûriyeyê de tê ava kirin car din dixwaze jin bindest bike, lê em ne jinên berê ne û em ê her dem pêşengê civaka xwe bin. Di dawî de jî em car din roja 8’ê Adarê li jinan pîroz dikin û em ê vê rojê weke tevahî rojên xwe bi têkoşîn pîroz bikin.”
Koordînasyona Akademiya Civaka Demoratîk a herêma Bakur û Rojhlatê Sûriyeyê Selwa Ehmed jî, diyar kir ku roja 8‘ê Adarê rojek pîroze û roja raperîna li dijî zilma desthilatdariya mêr e û wiha domand, “Ji 8‘ê Adarê heya roja me ya îro jî têkoşîna jin berdewam dike û nayê rawestandin. Jinên Rojava ji bo tevahî jinên cîhanê model in. Ji ber ku li dijî pergala modernîteya kapîtalîst serî rakirine û di ferqa kurahiya cewhera xwe de ne. Her wiha bi saya giştî jinên cîhanê û berxwedaniya wan em ê azadiyê pêk bînin.”
Selwa Ehmed, berxwedana şervanên YPJ’ê yên li eniyan û jinên ku li Bendava Tişrînê nobeta hevgirtina ligel şervanan digirin silav kir û got ku ew ê li dijî siyaseta qirêj bi dirûşmeya ‘Jin Jiyan Azadî’ têkoşîna xwe berfireh bikin û azadiya tevahiya jinên cîhanê misoger bikin.
