Hevseroka Saziya Avê ya Kantona Firatê Zozan Xelîl ji ANF’ê re axivî û diyar kir ku projeyên avê yên berdewam ji bo gel têne peyda kirin û diyar kir ku di çarçoveya projeyên ku li bajarê Kobanê bi rêbazên cûrbecûr hatine destpêkirin de bîrên nû hatine kolandin. Zozan Xelîl, da xuyakirin ku armanca van projeyan derbaskirina pirsgirêkên avê ye û av gihandina hemû taxan e.
`EV PROJE JI BO TAXÊN KU AV LÊ TUNE YE’
Zozan Xelîl, da zanîn ku ev proje bi sûd in û dikevin xizmeta gel û got, “Li bajarê Kobanê hin tax û kolan hene ku av nagihêje wan. Ev yek jî dibe sedem ku gel bi kirîna sarincan debara xwe ya jiyanê bikin. Kolana weke Miktel û Miştenûr jî mînaka wê yekê ye ku li wir av nîne. Niha jî li herdu kolanan bîr tên kolandin.”
Zozan Xelîl, diyar kir ku li her taxeke Kobanê ku av lê nîne wê ev proje li wir pêk were û wiha domand, “Li Taxa Botan Şerqî ku ew kolan jî bêy ave, wê li wir jî ev proje bê pêkanîn. Wê ev bîr bi şêwazekî av veguhere cihê belavkirin û li wan kolanên ku av lê tune ne, wê werin belavkirin. Armanca me ew e ku em avê bighîn in her deverê. Li ser rêya Helebê jî hin tax bêyî av in, li wir jî wê bîr bên kolandin. Depoya li Miştenûr 1,250 metre kab avê vedihewîne, wê ew depo tijî bibe û ji wan kolanên ku av lê nîne, belav bibe.”
‘BÎREK BI SERKETÎ BI DAWÎ BÛ YA DIN JÎ TÊ AMEDEKIRIN’
Zozan Xelîl, da zanîn ku wan hewl da ku ava vexwarinê ji bo hemû taxên bajarê Kobanê dabîn bikin û wiha dawî li gotina xwe anî, “Her bîrek 200 metre tên kolandin. Niha bîrek bi serketî bi dawî bû wê li Miştenûr û li ser riya bajarê Helebê jî wê bîr bên kolandin.”
