Di çarçoveya pêngava ‘Azadî ji Ocalan re, çareseriya siyasî ji pirsgirêka Kurd re’ ku ji bo Rêber Apo li seranserê cîhanê hate destpêkirin, li gelek bajarên Îtalyayê çalakî têne lidarxfistin. Di çarçoveya kampanyayê de rêze konserên ‘Tempo di Speranza’ (Dema Hêviyê) îsal li bajarê Brescia cara sêyemîn hatin lidarxistin.
Rojek ji festîvala bi heybet a li bajarê Brescia yê Îtalyayê îsal cara sêyemîn ji Rêber Apo û Kurdistanê re hate veteqandin, ku 33 sal in ji aliyê Radio Onda d’Urto ve tê lidarxistin. Di çarçoveya festîvalê de Buroya Enformasyonê ya Kurdistanê li Îtalyayê, Radio Onda d’Urto û Rete Kurdistan Italia panel û konserek lidar xistin.
Beriya konserê panela bi sernavê ‘Banga Aştî û Civaka Demokratîk; Li Tirkiye, Rojhilata Navîn û Cîhanê Bendewariyên Şoreşa Konfederal’ hate lidarxistin û parlamenterê DEM Partiyê Berdan Ozturk, Nûnerê Ewropayê yê DEM Partiyê Eyup Dorû, rojnamevan Mûrat Çinar û Daniela Galie û Berdevkê Buroya Enformasyonê ya Kurdistanê ya li Îtalyayê Yilmaz Orkûn beşdar bûn.
Berdan Ozturk qala banga 27’ê Sibatê ya Rêber Apo û bûyerên piştî wê kir. Berdan Ozturk anî ziman ku çareseriya pirsgirêka Kurd bi rêyên demokratîk wê bi kêrî her kesî bê û got, “Birêz Ocalan ne tenê ji bo Kurdan, ji bo gelan hemûyan modelekê pêşkêş dike. Têkoşîna Azadiyê ya Kurd bi komeke biçûk destpê kir, îro bandorê li milyonan mirovî dike. Li cîhanê pirsgirêkên bi vî rengî çawa hatin çareserkirin, Birêz Ocalan berevajî vê kir. Fesixkirina PKK’ê û şewitandina çekan nîşan da ku di vê mijarê de çiqasî bi biryar e.”
Ozturk işaret bi rîskên cidî yên pêvajoyê jî kir û got, “Birêz Ocalan beriya ku li benda dewleta Tirk bimîne gav avêt. Ev yek xwedî rîskên cidî ne, lê di heman demê de nîşaneya baweriya bi aştiyê ye. Dixwaze pirsgirêka Kurd ji nava şert û mercên şer rizgar bike û bigihîne asteke ku ji aliyê siyasî ve tê nîqaşkirin. Divê ev hewldan, destê Birêz Ocalan bê xurtkirin. Ez spasiya her kesî dikim ku li Îtalyayê vê têkoşînê dimeşîne. Divê têkoşîn û piştevanî hîn bêhtir bê xurtkirin. Azadî ne dûr e.”
Mûrat Çinar ku demeke dirêj e li Îtalyayê rojnamevaniyê dike, anî ziman ku li Rojhilata Navîn Kurdan û Ocalan hemû jiberî xera kirin û got, “Bêguman rîskên vê demê jî hene. Li aliyekî ve Şaredarê Bajarê Mezin ê Stenbolê Ekrem Îmamoglû hate girtin, li aliyê din wê aştî çawa pêk were? Ev yek di hişê mirovan de dibe sedema pirsan. Ji bo ev pêvajo bi rengekî erênî bi encam bibe, divê her kes, herî zêde jî dewlet gavê biavêje.”
Edîtora rojnameya Dinamo Press a li Îtalyayê Daniela Galie li ser şoreşa Rojava pêşkêşiyek kir û bi mînakan qala bicihhatina fikrê Konfederalîzma Demokratîk ê Rêber Apo kir. Galie got, “Min li Rojava dît bê gotina ‘Bêyî jinê şoreş nabe’ ya Ocalan çawa ketiye pratîkê.”
Galie destnîşan kir ku azadiya Rêber Apo gelekî girîng e û got, “Lîderekî girîng e ku ji bo me jinan ewqasî pêşniyarên erênî dike. Lewma ragirtina wî bi salan li girtîgehê, tecrîdkirina wî nayê qebûlkirin. Azadiya wî tê wateya azadiya bindestan hemûyan. Wezîfeya me hemûyan e ku em têkoşînê û piştevaniyê mezin bikin.”
Di panelê de Eyup Dorû û Yilmaz Orkûn jî axivîn û anîn ziman ku têkoşîna dostên Kurdan ên li Ewropayê hêja ye û divê piştevanî dewam bike.
herî dawî ji edîtorên Radio Onda d’Urto Michele Borra axivî û got, “Sê salên dawî em rojeke festîvala xwe ji azadiya Rêberê Gelê Kurd Ocalan re vediqetînin. Azadiya Ocalan ji bo me hemûyan girîng e.”
Piştî axaftinan ji xebatkarên Radio Onda d’Urto du aktîvîstên jin beşên ji parêznameyên Rêber Apo xwendin.
Herî dawî Bandabardo û koma ZAK derketin ser dikê û bi stranên xwe festîval xemilandin. Festîvala îsal li gorî salên derbasbûyî hîn girseyî û bi coş derbas bû.
