Di daxuyaniyê de sala nû li Rêber Apo hate pîrozkirin û hate gotin, “Em hêvî dikin ku sala 2026’an bibe sala azadiya fîzîkî ya Rêbertî û aştiya civakî ya demokratîk a gelên me.” KONGRA-GEL sala nû ya berxwedêrên li çiyê, zindanan û deverên cuda, gelê Kurd, gelên herêmê û ‘mirovahiya pêşverû’ silav kir.
Di peyamê de hate ragihandin ku di sala sedemîn a darvekirina Şêx Seîd û hevalên wî de Rêber Apo pirsgirêka Kurd “ji sêdarê derbasî ser maseya çareseriyê kir” û hate destnîşankirin ku di serî de gelê Kurd ji bo paşeroja azad û demokratîk a gelên herêmê hemûyan vê pêngavê firsendeke dîrokî û stratejîk afirandiye.
KONGRA-GEL bi bîr xist ku li ser bingeha banga Rêber Apo bi biryarên Kongreya 12’emîn re PKK’ê xwe fesix kir, komekê çek şewitand, hêzên gerîla xwe ji wan qadan vekişand ku rîska şer lê hebû û diyar kir ku van gavên hatin avêtin li cîhanê deng veda, piştgirî dît.
Bi dewamî hate ragihandin ku li pêşberî banga aştî û civaka demokratîk nêzîkatiya hikumeta AKP’ê ji bo çareseriyê ne cihê baweriyê ye, raporên ku AKP û MHP’ê pêşkêşî komîsyona meclîsê kirin jî giranî daye ser bêçekbûnê û ev yek dûrî bendewariyên aştî û demokrasiyê ye.
Di daxuyaniya KONGRA-GEL de hate destnîşankirin ku polîtîkaya AKP’ê ya li ser Sûriye û Rojava nêzîkatiya li daxwazên azadiyê yên gelê Kurd bi eşkere radixe pêş çavan. her wiha têkiliyên bi HTŞ’ê re hate bibîrxistin û hate gotin, nêzîkatiyên ewlekarîparêz dewam dikin ku armanc jê tasfiyekirina destketiyên Rêveberiya Xweser a Bakur û Rojhilatê Sûriyeyê ye.
KONGRA-GEL destnîşan kir ku şensê serketinê yê vê polîtîkayê êdî nemaye û hişyarî da ku Tirkiye ya wê bi aştî û çareseriya demokratîk pirsgirêkên xwe yên navxweyî çareser bike, yan jî wê bi krîzên hîn giran re rû bi rû bimîne.
Di daxuyaniyê de hate ragihandin ku sala 2026’an ji aliyê têkoşîna hêzên demokrasî û aştiyê ve wê bibe saleke diyarker. Her wiha hate gotin, bûyerên li herêmê diqewimin bi şênberî nîşan dide ku manîfestoya azadiyê ya Rêber Apo xwedî şensê serketinê ye.
KONGRA-GEL ji bo avakirina civaka demokratîk a li her qadê bang kir û got, “Em sala 2026’an bikin sala azadiya fîzîkî ya Rêber Apo.” Di daxuyaniyê de hate destnîşankirin ku azadiya Rêber Apo wê li ser bingeha çareseriya pirsgirêka Kurd ji bo gelên herêmê hemûyan derî li demokrasî û aştiyê veke.
Di daxuyaniyê de hate gotin, “Bi vê baawerî û coşê em sala nû ji dil û can li gelê xwe pîroz dikin û di têkoşîna aştî û demokrasiyê de serketinê dixwazin.”
