Kampanya ‘Dixwazim bi Abdullah Ocalan re hevdîtinê bikim’ bi beşdariya ji gelek beşên civakê di asta navneteweyî de berfireh dibe. Ji Kurdistanê jî tevlîbûneke xurt li kampanyayê heye. Şêniyên Ereb û Tirkmen ên li bajarê Sirînê yê kantona Firatê li ser mijarê ji ANF’ê re axivîn û daxwaza hevdîtina bi Rêber Apo re kirin.
Mihemed Receb Mustefa ku ji pêkhateya Tirkmen a ji bajarê Sirînê hêviya xwe ya ji bo dîtina Rêber Apo anî ziman û got, “Êdî em dixwazin Rêberê me fîzîkî azad bibe. Yekemcar di dîroka Sûriyeyê de netewbûneke demokratîk ya di vê astê de pêk hatiye. Ev fikra ku her kesî di nava xwe de dipejirîne ji bo me rêya çareseriyê ye. Em jî weke neteweya Tirkmen bang li tevahî saziyên di bin sîwana Mafên Mirovan de dikin ku demildest êdî azadiya fîzîkî a Rêber Apo misoger bikin. Em hemû neteweyên li vir, Kurd, Ereb, Tirkmen, Asûr, Siryan, Çerkes û Kildan û Êzîdî em li vir yek dil in û yek dilê me heye ew jî ji bo azadiyê ye.”
Ji pêkhateya Ereb û endamê Desteya Edaletê Hecî Mihemed anî ziman ku em bi saya fikrê Rêber Apo bi hev re dijîn û got, “Em bi fikrê Rêber xwe bawer in, ji ber ku fikrê Rêber Apo jiyan ji me re ava kir. Îro jî fikrê Rêber Apo li ser vê axê çareserî ye. Ne tenê li Kurdistanê lê li tevahiya cîhanê fikrê Rêber Apo çareserî ye. Em jî heta dawiyê bi fikrê Rêberê xwe re ne û em ê bi fikrê Rêberê xwe bigihêjin serketinê.”
Hevserokê Meclîsa Navçeya Remalê Neyif Selal ê ji pêkhateya Ereb anî ziman ku ew bi fikrê Rêber Apo bawer in, wê bi ser bikevin û got, “Me tevahî neteweyên li vir bi sedan şehîd dane, Em amade ne heta dawiyê rabin û em ê bihêlin ku Rêberê xwe fîzîkî azad bikin.”
