Li Fransayê di çarçoveya Roja Jinên Kedkar ên Cîhanê de, bi banga rêxistinên femînîst li seranserê welat li 95 xalên cuda çalakî hatin lidarxistin. Di çalakiyên ku bi banga platforma Grève Féministe di 7-8’ê Adarê de hatin lidarxistin de, jinan destnîşan kir ku 8’ê Adarê ne tenê rojeke sembolîk e, lê roja têkoşîna li dijî nexweşiyan e.
PARÎS
Li paytext Parîsê çalakî ji saetên sibê ve dest pê kirin. Jinan ji saet 10.00’an û pê ve li qada Place de la Bataille de Stalingrad kon vedan û “gundê jinan” ava kirin.
Di nava rojê de li ser ne wekheviya di perwerde û jiyana xebatê de, şîdeta mêr û geşedanên li Îran û Rojavayê panel û gotûbêj hatin lidarxistin. Di qada Stalingradê de her wiha panela ku geşedanên li Rojava, Îran û Amerîkaya Latîn hatin girtin hate lidarxistin. Di panelê de pergala azadiya jinê ya li Rojavayê hate vegotin, her wiha rejîma melayan a li Îranê û polîtîkayên şer ên li herêmê hatin nîqaşkirin.
BORDEAUX
Di çarçoveya 8’ê Adarê Roja Jinên Kedkar ên Cîhanê de, wekî gelek bajarên Fransayê, li Bordeaux’ê jî zêdetirî 12 hezar kes ji bo mafên azadiyê yên jinan derketin kolanan.
Meşa ku bi banga rêxistinên jinan, sendîka û tevgerên cuda yên civakî hat lidarxistin, saet di 13.00’an de li qada Place de la Victoire dest pê kir.
Jinan di dirêjahiya meşê de daxwazên xwe yên wekî mûçeya wekhev, bidawîkirina tundiya li ser jinê, mafên jinên koçber û penaber, têkoşîna li dijî nijadperestî û rastgirên tund qêriyan.
Gelek kolektîfên femînîst, platformên jinan, sendîka û rêxistinên xwendekaran, Tevgera Jinên Kurd a Fransayê (TJK-F), Yekîtiya Jinên Sosyalîst (SKB), rêxistinên jinên Elewî, komeleyên koçber û piştevaniyê û rêxistinên jinên koçber beşdarî meşê bûn. Meş li navenda bajêr bi axaftin û bangên piştevaniyê bi dawî bû.
ROUEN
Hunermend û arşîvvana Kurd a li sirgûnê Sarya Nurcan Kaya, li bajarê Rouenê beşdarî bernameyeke 8’ê Adarê bû. Çalaki ji aliyê Parti Communiste Français ve hat organîzekirin. Di vê hevdîtinê de Sarya Nurcan Kaya berxwedana jinên Kurd û jidayikbûna felsefeya “Jin, Jiyan, Azadî” vegot.
Kaya di axaftina xwe ya bi sernavê “Felsefeya ku ji Çiyan Diherike: Jin, Jiyan, Azadî” de destnîşan kir ku ev gotin ne tenê dirûşme ne; ew felsefeyek rastîn a jiyanê ye ku ji êş, berxwedan û hêviya sedsalan çêbûye. Li gorî wê, “Jin, Jiyan, Azadî” di dilê tevgera azadiya Kurd de ji dayik bûye û bi taybetî di nav têkoşîna jinan de wateya xwe ya kûr ditiye.
Sarya Nurcan Kaya di axaftina xwe de got: “Jin, Jiyan, Azadî bangawaziya ji nû ve avakirina girêdana qutbûyî ya di navbera jin û jiyanê de ye.”
MULHOUSE
Li Mulhouse’ê, çalakiya ku ji aliyê Collectif féministe du 68 ve ku gelek sazî û rêxistin tê de cih digirin hat lidarxistin, bi beşdarbûneke xurt pêk hat. Di çalakiyê de bal hat kişandin ser piştevaniya jinan a navneteweyî û têkoşîna hevpar. Beşdaran bal kişandin ser girîngiya rêxistinbûna li dijî bilindbûna rastgirên tund. Berxwedana YPJ’ê ya li Rojavayê hate silavkirin.
Di çalakiya ku xwendekaran bi giranî beşdar bûn de, rê neda provokasyonên rastgirên tund. Çalakî bi dirûşmeyên “Bijî piştevaniya jinan, Jin Jiyan Azadî, ji faşîstan re cih nîn e” berdewam kir. Gelek saziyan daxuyanî xwendin û marşên jinan hatin gotin. Daxuyaniya TJK-F’ê ya Înisiyatîfa Jinê ya Sema Yuce hate xwendin û çalakî bi govendê bi dawî bû.
MONTPELLIER
Li bajarê Montpellier a Fransayê, ji aliyê Kolektîfa Piştevaniya bi Gelê Kurd re ku ji partiyên siyasî, sendîka û rêxistinên civakî pêk tê beşdarbûneke girseyî pêk hat. Meş li qada Place Alpert dest pê kir.
Piştî meşê li qada Komedie mîtîngek hat lidarxistin. Di axaftinên ku li ser navê Komeleya Demokratîk a Kurd hatin kirin de hat destnîşankirin ku têkoşîna azadiyê ya jinên Kurd ji bo hemû jinên cîhanê çavkaniya îlhamê ye.
Di çalakiyê de her wiha li dijî şîdeta li ser jinê, polîtîkayên şer û êrîşên li ser destkeftiyên jinan banga têkoşînê hate kirin.
