Li bajarên Enqere, Edene, Mersîn û Antalyayê jinan bi munasebeta 8’ê Adarê Roja Jinan a Cîhanê Meşa Şevê ya Femînîst li dar xistin.
ENQERE
Saziyên jinan ên Enqereyê û Feminîstên Xweser bi boneya 8’ê Adarê Roja Jinên Cîhanê 20’emîn meşa şevê li dar xistin.
Saziyên jinan ên Enqereyê û Feminîstên Xweser bi minesebeta 8’ê Adarê Roja Jinên Cîhanê ji bo 20emîn meşa şevê li Rêya Yuksel a navçeya Çankayayê hatin ba hev. Jinan li vir demekê dirêj dirûşmeyên, “Jin jiyan azadî”, “Raperîn şoreş û azadî” “Bijî têkoşîna me ya rêxistinkirî”, “Hevî aştî û berxwedan”, “Hezar silav ji jinên li Rojava li ber xwe didin”, “Hezar silav ji jinên li Filîstînê li ber xwe didin” û “Bi berxwedanê em ê bi derbikevin” berz kirin.
Piştre jî jinan bi gelek pankart û dovîzên qala têkoşîna jinan dikin dest bi meşê kirin. Bi hezaran jin bi berzkirina dirûşmeyan li Rêya Yukselê heta Rêya Sakaryayê meşiyan. Girseyê demekê dirêj li Rêya Sakarya govend gerandin, stran gotin û dirûşm berz kirin. Piştî meşê li Rêya Sakaryayê daxuyanî hate dayin. Daxuyanî bi Kurdî, Erebî û Tirkî hatin xwendin.
‘EM LI HER DERÊ AŞTIYÊ DIXWAZIN’
Daxuyaniya Kurdî ji aliyê şanoger û aktivîsta Tevgera Jinên Azad (TJA) Zelal Angay ve hate xwendin. Zelal Angay bi lêv kir ku ew li dijî pergala patriyarkar û tunehesibandina kêda jinan li qadan in û wiha got: “Li çar aliyên cîhanê pergala mêr jiyana jinan dorpeç dike. Li Rojava pergala jiyana azad a jinan hedef tê girtin. Li Filîstînê komkujiya Îsraîle didome. Li Afganîstanê jin tune tên hesibandin. Li Iraqê Yaenar Mihemed ku avakara rêxistina azadiya jinan bû hat kuştin. Li Îranê rejîma molla jinan dikuje û mudaxaleya emperyalist tevahî civakê qir dike. Li her derê şer heye. Jin û LGBT hedef tên girtin. Em li her derê aştiyê dixwazin.”
Piştî daxuyaniyê çalakî bi berzkirina dirûşmeyan û gerandina govendê bi dawî bû.
EDENE
Li Edeneyê jin bi dirûşma “Di 8’ê Adarê de Serhildana Femînîst” kom bûn. Jinên ku li ser Kolana Gazîpaşayê civiyan, li vir dirûşmên “Jin, jiyan, azadî” berz kirin û bi stranan ve govend gerandin.
Di meşa ku bi beşdariya gelek jinan pêk hat de, bi dirûşman ve bertek nîşanî zext, êriş, şer û xizaniyê hat nîşandan. Jin ji Kolana Ataturkê heta Parka Ataturkê bi berzkirina dirûşmên “Jin, jiyan, azadî”, “Bijî piştevaniya jinan”, “Kuştina jinan polîtîk e”, “Jin şer naxwazin” ve meşiyan.
‘EM Ê SERHILDANA XWE YA FEMÎNÎST GEŞ BIKIN’
Piştî meşê, li ser navê koma Meşa Şeva ya Femînîst a Edeneyê, Pelîn Songul Çîçekê daxuyanî da û ev tişt got: “Em ê ji bo aştiyê têkoşîna xwe bidomînin. Wekî her 8’ê Adarê, em îro jî wezîfeya dewlet, desthilatdarî û rêveberiyên xwecîhî bi bîra wan dixin û daxwazên jinan bi dengekî bilind tînin ziman. Em dizanin ku daxwazên me tenê bi têkoşîna jinan a rêxistinkirî pêkan in. Ji bo jiyan û mafên xwe, em ê têkoşînê bidomînin û serhildana xwe ya femînîst geş bikin.”
ANTALYA
Li Antalyayê jî jin ji bo Meşa Şevê ya Femînîst li Deriyê Hadriyan civiyan. Jinan xwestin ber bi Qada Cumhuriyetê ve bimeşin, lê polîsan rê neda wan. Jinan li dijî astengiya polîsan bi muzîk û govendê çalakî pêk anîn. Bername bi gerandina govendê bi dawî bû.
MERSÎN
Li Mersînê 12’yemîn Meşa Femînîst a Şevê bi tevlibûna hezaran jinî ji Kolana Kushîmoto heta Qada Ozgecan Aslan meşiyan. Jinan pankarta ‘Em di jiyanek azad û wekhev de bi israrin’ vekirin û bê navber dirûşmeyên ‘jin jiyan azadî’ berz kirin.
Di meşa ku li Qada Ozgecan Aslan bidawî bû de axaftin hatin kirin. Aktîvîsta TJA’yê Sara Kaya ewil axivî û da zanîn ku ew berxwedana jinên li Rojava silav dikin û got têkoşîna wan wê heta avabûna civakeke demokratîk bidome.
‘EM BI SERHILDANA XWE LI KOLANAN E’
Li ser navê meşa Femînîst a Şevê, Seroka Komeleya Jinan a Mîmoza Çîgdem Goksoy axivî. Çîgdem Goksoy daxuyakirin ku ji bo jiyan û keda xwe hatine gel hev û di jiyaneke azad û wekhe vde bi israrin, dengê serhildana jinan li qadan bilind dikin. Çîgdem Goksoy wiha got: “Em li dijî tunehesibandin, tundî, binpêkirina kedê, êrîşên li ser jinan li her derê di serhildanê de ne. Em vê 8’ê Adarê jî li kolanan e.”
Parlamentera DEM Partî ya Mersînê Perîhan Koca jî axivî û got: “Em têkoşîna jinê wek avakirina civakeknû rêxistin dikin. Ji aliyê pergala serdestiya mêr ve li hember jinan şer hatiye destpêkirin. Em di hawireke qirkirina zayendî de ne. Ji Rojava heta Îranê, jinên ku tarîtiyê belav dikin silav dikin.”
Daxuyanî bi stran û govendê bidawî bû.
