Partiya Jiyana Azad a Kurdistanê (PJAK) bi wesîleya 15’ê Gulanê Cejna Zimanê Kurdî peyamek weşand.
Di daxuyaniyê de hatiye diyarkirin ku 15’ê Gulanê roja zimanê Kurdî rojeke ji bo rêzgirtina li çanda kevnar û resen a gelê Kurde û tê gotin: “Zimanê Kurdî beşek giring û binirx yê pir çandiya li Rojhilata Navîne. Ev roj li tevayî azadîxwaz, welatparêz, parêzvanên nasname û rûmeta gelê Kurd pîroz be.”
Di dewamê de tê gotin: “Zimanê Kurdî wek yek ji zimanên herî kevnar, dewlemend û zindî yên cîhanê ye. Amrazekî giring û xwezayiye ji bo derbirîna nirxên jiyana azad, demokratîk û mirovî. Rêzgirtina li zimanê Kurdî û hewldana ji bo pêşxistin û xurtkirina wê ya li her çar parçeyên Kurdistanê, li dijî polîtîkayên qirkirina çandî yên sîstemên deshilatdar, ne tenê erkeke çandî ye, di heman demî de erkekî exlaqî, siyasî û rewşenbîrî ye.”
Di dewama daxuyaniyê de tê gotin ku zêdetirî sed salin gelê Kurd li dijî siyaseta înkar, bişaftin û qirkirina çandî li berxwe dide û divê oxirê de gelek şehîd dane. Bi vê boneyê ew şehîdên rêya azadî û zimanê Kurdî bibîr tînin.
PJAK dibêje: “Gelê kurd tevî têgihiştineke kûr a li ser girîngiya têkoşîna azadî û demokrasiyê, di aliyê madî û manewî de jî gelek qurbanî dane. Ev gelê kevnar bi piştgirêdana bi vîna xwe ya komînal û fedekariya xwe ya bêhempa, serdema qirkirina çandî derbas kiriye û niha di qonaxa gihîştina azadiyeke tam de ye. Zimanê Kurdî, wekî bingehek sereke ya nasnameya çandî, beşeke ji mîrateya mirovahiyê û dewlemendiya cîhana ziman û çandan.”
Di beşek din ya daxuyaniyê de tê gotin: “Bihêzkirin û pêşxistina zimanê me ne tenê parastina nasnameya gelê Kurde, lê belê gaveke bibandor a ber bi bihêzkirin û geşepêdana çandî, demokrasiya rastîn û rasterast a li herêmêye. Zimanê Kurdî zimanê derbirîna rewayetiya çandî ya bi hezaran sala ya gelên Zagrosêye û di heman demê de landika çanda mirovahiyê ya li herêmê ye. Her wiha di herikîna têkoşîna gelê me de, bûye zimanê derbirîna rastîn ya azadî û demokrasiyê. Zirar gihandina vî ziman û çandê, zirareke ku nayê qerebûkirin û ziyaneke digihe hemû gelên Rojhilata Navîne.”
Her wiha di dirêjiya daxuyaniya PJAK’ê de tê gotin: “Li Rojhilatê Kurdistan û Îranê, zimanê Kurdî wek zimanê têkoşîna azadiyê, geşbûna hişmendiyeke demokratîk û dirûşmeya tije wate ya “Jin, Jiyan, Azadî” lê hatiye û di vê çarçoveyê de destkeftiyên girîng bi dest xistine. Niha Îran rûbirûyê qonaxeke dîrokî ya guhertinan bûye, pêwîste bi rêya guhertineke bingehîn, dawî li desthilatdariya zalim û pêvajoya qirkirina çandî were anîn û di şûna wê de pêkhateyeke demokratîk ku rêzê li hemû netewe û zimanan bigire, were avakirin. Ji bilî vê, tu vebijarkeke leşkerî nikare wek berê çand û zimanê Kurdî rûbirûyê tunebûnê bike. Ji ber ku gelê me ji bo parastina zimanê Kurdî, wê bi awayekî yekalî têkoşîna xwe berdewam bike.”
Di daxuyaniya PJAK’ê de tê diyarkirin ku pêşxistin û xurtkirina zimanê Kurdî û bikaranîna wê erkê herkesî ye û wiha dom dike: “Pêwîste her malek ji bo fêrbûn û bihêzkirina zimanê Kurdî bibe dibistanek. Li ser vî bingehî em bang li hemû çalakvanên civaka sivîl, rewşenbîr, mamosta, ciwan, jin û çîna hişyar ya civakê dikîn ku ji bo rêxistinbûna xwe ya demokratîk, di hemû qadên girîng de ji bo parastin, bihêzkirin û pêşxistina zimanê Kurdî têkoşîna xwe xurt bikin. Em dubare dikin ku her gotinek, her nivîsek û her parçeyekî zimanê kurdî bi hemû zaravên xwe ve, ji aliyê me ve wekî çalakiyek, têkoşîn û pêngaveke civakî tê dîtin.
Em wek meclîsa PJAK Roja Zimanê Kurdî pîroz dikin. Her wiha em piştgiriya xwe ji pêngava gelê Kurd ya ku li Rojavayê Kurdistanê ji bo fermîkirina zimanê Kurdî hatiye despêkirin re nîşan didîn. Em daxwaz ji gelê Kurd dikîn ku bi hemû şêwazek di nava jiyan û karê rojane de bi awayek zanistî fêrî ziman û zaravayên xwe bibin û bi awayek hestiyar nêz bibin.
Her wiha em daxwaz ji gelê xwe dikîn ku di vê dema hestiyar de bi awayek çalak tevlî têkoşîna azadî û demokrasiyê bibin. Ji berku tenê bi îradeya komî ya gelê me em dikarin hemû rojek bikin roja pêşxistin û bihêzkirina zimanê Kurdî.”
