Neteweyên Yekbûyî (NY) plan dike ku ji sedî 20 ê 37 hezar xebatkarên xwe ji kar derxîne. Li ser nerazîbûnan di bin navê ‘qutbûna zû’ bernameyeke dilxwazî da destpêkirin. Bernameya ku heta 12’ê Îlona 2025’an serlêdan dikare lê bê kirin, teqawîtbûna pêşwext jî di nav de ji bo qutbûna bi dilxwazî derfetan dide.
Bernameya ku ji aliyê Departmana Ahengî, Polîtîka û Stratejiya Îdarî ya Neteweyên Yekbûyî DMSPC) ve hate destpêkirin, ji xwe re dike armanc ku bandorên neyînî yên derxistina ji kar a ji neçarî ya paşerojê kêm bike. Lê belê Sendîkayên Personel ên NY’yê hişyariyê didin ku ev bername di rastiyê de ‘bi dilxwazî’ nîne, dibe ku bibe tasfiyeyeke nixumandî.
Serokê Sendîkaya Personelan a NY a li Cenevreyê Ian Richards diyar kir ku stratejiya planê nediyar e.
Ji Sendîkaya Personel a UNOG Naima Abdellaoui jî îdîa kir ku zexta derûnî li hin xebatkaran hatiye kirin ji bo serlêdanê bikin û got, dibe ku li gorî pîvana temen cihêkarî bê kirin.
Şêwirmenda UNDP û UNICEF’ê ya berê Stephanie Hodge ragihand ku bername di rastiyê de bi navê ‘teqawîtiya pêşwext’ dikare bibe bidawîkirina wezîfeyê ya ji neçarî.
Hodge got, “Eger NY kadroyên bi garantiya demdirêj bi peymanên demkurt biguherîne, hingî serxwebûna xizmetên cemaweriyê yên navneteweyî û hişê sazîbûnê wê tine bibe.”
Sekreterê Giştî yê Neteweyên Yekbûyî Antonia Guterres meha derbasbûyî bi daxuyaniyekê ragihandibû ku hin yekîne dikarin li stasyonên wezîfeyê yên bi maliyeteke kêm bêne bicihkirin, bêne biçûkkirin an jî bi temamî ji holê bêne rakirin.
Yên ku di çarçoveya bernameyê de cihê bibin piştî demekê wê careke din nikaribin di nava sîstema Neteweyên Yekbûyî de bixebitin. Her wiha wê tazmînateke zêdetir an jî muçeyê dema îxbarê ji wan re neyê dayin.
