Hem li Kurdistanê hem jî li Tirkiyeyê jinan dest bi karên ji bo 8’ê Adarê Roja Jinên Kedkar ên Cîhanê kirin. Tê payin ku di hefteya 8’ê Adarê de li gelek bajaran çalakiyên bi coş bêne lidarxistin. Tevgera Jinên Azad (TJA) 17’ê Sibatê bid eklarasyonekê wê dest bi karên 8’ê Adarê bike. Jin wê bi dirûşma “Em xwe bi berxwedanê bi rêxistin dikin, civaka demokratîk ava dikin” li hev kom bibin û li Amedê serdana hezar û 100 malî bikin. Jin wê îsal bi mijarên aştî û berxwedanê dakevin qadan.
‘BI CIVÎN, ATOLYE Û SERDANA MALAN EM Ê LI QADAN BIN’
Aktîvîsta Tevgera Jinên Azad (TJA) Bahar Peker li ser amadekariyên xwe yên ji bo 8’ê Adarê axivî. Peker diyar kir ku wê di 17’ê Sibatê de bi deklarasyonê dest bi kar bikin, piştî çalakiyên li gelek bajaran wê li Amed, Wan û Rihayê mîtîngên fînalê lidar bixe. Peker got, “Em ê îsal bi ruhê ked, berxwedan û azadiyê li qadan bin. Bi salan e li dijî her cûre qirkirina jinê, şer û pergala mêtingeriyê jin dadikevin qadan. Îsal li hemberî êrişên li ser destketiyên jinan em ê hem li Kurdistanê hem jî li Tirkiyeyê dengê xwe bilind bikin. Weke TJA em dest bi karên xwe yên ji bo 8’ê Adarê dikin. Li Amedê em ê serdana 1100 malî bikin. Di heman demê de civîn û kombûnên jinan lidar dixin. Em ê van civînan bi formata atolyeyê lidar bixin û hewl bidin civaka demokratîk bi hev re ava bikin.”
‘JIN HÊMANA ESASÎ YA PÊVAJO Û TÊKOŞÎNÊ YE’
Peker anî ziman ku di civînên jinan de ew mijarên cuda dinirxînin û got, “Di civînên xwe yên sê rojên dawî de em tundiya li hemberî jinê, îstîsmarkirina zarokan û polîtîkayên şerê taybet nîqaş dikin. Jin di têkoşîna civakî de veguherîn hêmaneke hîn xurt a esasî. Em îro dibînin ku jin hîn çalak in.”
Peker destnîşan kir ku wê destpêka çalakiyên 8’ê Adarê li ser bingeha piştevaniya bi gelên Rojava re bikin û got, “bi esasgirtina gelên Rojava em ê destpê bikin. Piştre li Bismil, Amed û Deriyê Sînor ê li Rihayê em ê 8’ê Adarê pîroz bikin. Ber bi 8’ê Adarê ve em ê mafên jinan û gelên li Rojava li ber çavan bigirin û li ser vê bingehê kar bikin.”
‘8’Ê ADARÊ YA ÎSAL JI BO JINAN TÊ WATEYA AŞTÎ Û TÊKOŞÎNÊ’
Peker bal kişand ser şer ku li tevahiya cîhanê diqewime û got, “Ji Efganistanê heta bi Îranê, ji Rojava heta bi Kobanê li her derê berdêla herî giran a şer jin û zarok didin. Di şer de jin têne kuştin, dîl têne girtin an jî bi zorê têne koçberkirin. Di êrîşên DAÎŞ’ê yên li ser kobanê de bi hezaran jin hatin ukştin, jinên Êzidî û Kurd hatin revandin. Li gel ku sal di ser re derbas bûne hîn jî aqûbeta gelek jinan nayê zanîn. Êrişên li hemberî Rojava niha têne kirin û polîtîkayên li dijî bedena jinê em qebûl nakin. Li dijî vî mejî em ê timî li qadan têkoşîna xwe dewam bikin.”
‘EM Ê BI KEZIYÊN XWE LI QADAN BIN’
Peker bal kişand ser pitşevaniya jinan û diyar kir ku destdirêjiya li bedena jinê destdirêjiya li azadiyê ye, wê têkoşîna xwe ya li dijî sîstema ku xwe ji vî mejî xwedî dike dewam bikin û got, “Wê rojê em ê bi keziyên xwe, em ê bi dengê xwe li qadan bin.”
‘JI BO AŞTIYA MAYINDE DIVÊ MAFÊ HÊVIYÊ BÊ NASKIRIN’
Peker işaret bi banga 27’ê Sibatê kir û got, “Bi hûnandina aştiyê em ê ber bi 8’ê Adarê ve bimeşin. Mafê hêviyê ji bo Birêz Abdullah Ocalan di rojevê de ye. Lê belê azadiya wî ya fîzîkî pêk nehatiye. Ji bo pêkhatina aştiyeke mayinde divê mafê hêviyê bê naskirin û azadiya fîzîkî pêk were.”
