Kongra Star îro li Stadyuma Heysem Kiço ya li bajarê Qamişlo bi dirûşmeya “Li hember qirkirin û dagirkeriyê Jin, Jiyan, Azadî” çalakiyek li dar xist. Çalakî ji bo piştgiriya berxwedana dîrokî ya gelê Şêxmeqsûd, Eşrefiyê û Benî Zêd û ji bo rêzgirtina li bîranîna şehîd Denîz Çiya û hevalên wê yên şehîd, hat lidarxistin.
Çalakî bi rêzgirtinê dest pê kir, piştre berdevka Kongra Star Rîhan Loqo axivî û got: “Ji destpêka şoreşê ve me digot an em ê bi rûmet bijîn an jî bi rûmet bimirin û em ê teslîm nebin. Ji zikê dayikên me, lehengên berxwedanê, şervan û têkoşer çêdibin.”
Rîhan Loqo da zanîn ku şehîd Denîz sembola berxwedana Şêxmeqsûd û Eşrefiyê ye û dê berxwedana li hember çeteyên dewleta Tirk û yên hikumeta demkî, bi rihê Jin, Jiyan, Azadî, berdewam bike.
Ji Rêveberên Hêzên Ewlekariya Hundirîn-Jin Helat Mihemed jî axivî û bal kişand ser rola jinan di berxwedana dîrokî ya 6 rojan a li Şêxmeqsûd, Eşrefiyê û Benî Zêd de. Helatê destnîşan kir ku ew berxwedan nimûneyeke pêşketî ya fedakarî, berxwedan û parastina rûmeta mirovan bû.
Helat bêrêziya li cenazeyê şehîd Denîz ji aliyê çeteyên hikûmeta demkî ya Sûriyeyê ve şermezar kir û diyar kir ku ev kiryar nirxên mirovî û peymanên navneteweyî binpê dikin û hewldaneke ji bo şikandina îradeya civakê û belavkirina terorê ye.
Di dawiya çalakiyê de beşdaran 3 caran sonda dewamkirina têkoşînê da û dirûşmên ku berxwedana Şêxmeqsûd û Eşrefiyê silav dikin, berz kirin.
