Jinên ji Qamişloyê bi dirûşma “Bi felsefeya Jin, Jiyan, Azadî em destketiyên şoreşa jinan diparêzin” 8’ê Adarê Roja Jinan a Cîhanê bi pêşengiya Kongra Star li Stadyûma Heysem Kiço ya li bajêr bi mîtîngekê pêşwazî kirin.
Jinên beşdarî mîtîngê bûn ji ANF’ê re axivîn û 8’ê Adarê li jinan hemûyan pîroz kirin.
Destpêkê Feyrûza Îbrahîm axivî û got, “Em roja têkoşîna jin a cîhanê li jinan hemûyan û bi taybetî li jinên ku di çeperên şer de ne pîroz dikin. Îro jinan gavên mezin avêtine û li tevahiya cîhanê bi roleke mezin rabûne. Jinên Rojava jî li her qada jiyanê bûnek mînak. Heta roja me ya îro jinan gelekî têkoşiyan û destketî afirandin. Şoreşa ku jin tê de nebe, şoreş nîne.”
Endama Rêveberiya Rêxistina Sara, Nesrîn Mehmûd anî ziman ku îsal 8’ê Adarê cuda ye û bi vî rengî qala cudahiya vê carê kir: “Em 8’ê Adarê li hemu jinên têkoşer ên cîhanê pîroz dikin. Îsal 8’ê Adarê ji salên derbasbûyî cudatir e. Ji ber ku êşa me weke dayikên Kurd yek e. Banga me ji bo hemû cîhanê û rêxistinên mirovî ew e ku ji bo dîlgirtiyan bixebitin. Gelo ev dîl girtî li ku derê man, ev şervanên ku bi dehan salan di nava tekoşînê parastina ax û gelê xwe de bûn û şerê DAÎŞ’ê dikirin li ku man. Îro çarenûsa şervan û zarokê me ne diyar e.”
Endama Meclîsa Jin Mûna Yusuf jî 8’ê Adarê li jinên cîhanê pîroz kir û got, “Mîrateya dîrokî ya têkoşîna ku jinan li seranserê dîrokê dane, ji Rosa Luxemburg bigire heta Sakîne Cansiz û hemû Yekîneyên Parastina Jinê yên ku li dijî terorê şer kirin, şahidiya berxwedana wan e. Îro em pîrozbahiyên xwe li jinên cîhanê, bi taybetî yên li Sûriye û Bakurê Rojhilatê Sûriyeyê dikin. Ev zêdetirî 15 sal e jinan meşaleya têkoşînê hilgirtine û ji bo bidestxistina mafên xwe yên rewa têdikoşin. Jin rastî her cûre tundiyê hatin; ji koçberî, êşkence, girtin û gelek cûreyên din. Lê dev ji mîrateya xwe ya têkoşînê bernedaye û di dewamkirina têkoşînê de bi israr in.”
Mûna Yusuf bi dewamî anî ziman ku wê her tim têkoşîna xwe bilindtir bikin û wiha got, “Roja têkoşîna jinan a cîhanî îsal cuda û dîrokî ye. Bi taybetî di şert û mercên heyî de. Şerên ku li dijî jinan hatine kirinbi armanca têkbirina têkoşînê bû, lê jin bi biryar in ku têkoşîna xwe bidomînin. Îro, divê jin her gavê ji bo parastina destketiyên ku ji destpêka şoreşê ve bi dest xistine bixebitin. Divê mafên jinan di Destûra Sûriyeyê ya nû de werin bicihkirin û divê ev maf di hemû qonaxên veguhêz de hebin. Divê jin di hikûmetê de werin temsîlkirin û di hemû aliyan de mafê wan ê beşdariya siyasî hebe. Ji ber vê yekê, em têkoşîna xwe ji vê xwepêşandanê û hemû xwepêşandanên ji bo her jinekê tê lidarxistin bi hêztir dikin. Ji ber ku di her şer û pirsgirêkê de yên herî zêde êş, windahî û azaran dikşîne jin in. Em weke jin soz didin ku em ê di têkoşîna xwe de israr bikin heta ku em mafên xwe bi dest dixin.”
Hevseroka Partiya Yekîtiya Demokratîk a herêma Cizîrê Ayhan Murad jî got, “Îro rojeke dîrokî ye; Roja 8 Adarê roja jinên cîhanê yên kedkar, roja berxwedan û têkoşînê li hemberî qirkirinê zilmê u zordarî sed salan e. Rêber Apo bi fikir û vîna azad beriya sala 1999 weke vê rojê girîngî da 8’Adarê. Bi dirûşmeya ‘Jin, Jiyan, Azadî’ em ê destetiyên şoreşa jinê biparêzin. Ev berxwedan û têkoşîn her tim mezintir dibe. Fikir û felsefa ya Rêber Apo hişt ku em li ser piya bin. Di destpêkê de ji Ş.Sakîne Cansiz heta bigihe Denîzan, Berîtanan, Şîlanan, Viyanan ên ku xwe ji bo wê rojê xwe kir pir; em şehîden xwe bi bîr tînin. Em soz û biryardariya xwe ji şehîden xwe re nû dikin ku xwedî li doz û hêviyên wan derkevin.”
Ayhan Murad di dawiya axaftina xwe de got, “Îro zarok û şervanên me dilgîrtîne em bi wê hêrsê îro kom bûne. Hemû cîhan dizane ku di sala nû de careke din bi komployeke nû re rû bi rû hatin. Êrişên li ser herêmên me destketiyên me hedefgirtin. Ji ber vê jî pir girîng e ku di roja îro de careke din em soza xwe bi şervan û şehîdên xwe nû bikin û em ê her tim têkoşîna xwe bilindtir bikin.”
