Li tunelên berxwedanê yên li Herêmên Parastinê yên Medyayê tîmên gerîla yên pispor li hev kom bûn û Newroz pîroz kirin. Ji fermandarên HPG’ê Egîd Reşîd li merasîma leşkerî axivî.
SOZA JI BO SERXISTINA ARMANCÊN ŞEHÎDAN
Egîd Reşîd got, “Newroza azadî û civaka demokratîk a Rêber Apo di serî de li Rêber Apo, şehîdên şoreşê, gelê Kurd, gelê herêmê û hevrêyan hemûyan pîroz be. Di 27’ê Sibatê de Rêber Apo bangeke dîrokî li tevgera me, gelê Kurd û gelên herêmê kir. Weke Gerîlayên Azadiyê yên Kurdistanê me coş û moraleke mezin ji vê banga Rêber Apo wergirtin. Ev yek bû sedem ku em têkoşîna xwe hîn mezin bikin. Me bi serbilindiyeke mezin banga dîrokî ya Rêber Apo pêşwazî kir. Em gelekî bi coş, moral û serbilind bûn ku me Rêber Apo careke din dît. Di şexsê Kawayê Hemdem Mazlûm Dogan, Rahşan Demîrel, Zekiye Alkan û dayika aştiyê ya hêja Sakîne Arat de hemû şehîdên Kurdistanê bi hurmet bi bîr tînin. Em soza xwe dubare dikin ku armancên şehîdan bi ser bixînin.”
AZADIYA RÊBER APO AZADIYA KURDISTANÊ YE
Reşîd got, “Em baş zanin ku ev pêşketin bi saya berxwedana bêhempa ya 27 salan a Rêber Apo ya li Îmraliyê, ked û xwîna hevrêyên me yên şehîd pêk hat” û bi vî rengî dewam kir, “Ji bo pêkanîna azadiya Rêber Apo em tevlî vê tevgerê bûn û me dest bi vê têkoşînê kir. Ji ber ku em zanin, azadiya Rêber Apo azadiya Kurdistanê, gelê Kurd û gelên herêmê ye. Em ji dil ji vê yekê bawer dikin û amade ne ku di vê oxirê de canê xwe feda bikin. Bi salan e em li ser fikir û felsefeya Rêber Apo xwe perwerde dikin. Ji bo me ti qîmeta gotina hinekî din nîne. Ji bo me ya girîng azadiya fîzîkî ya Rêber Apo ye. Heta ku azadiya fîzîkî ya Rêber Apo pêk were gotina kesî ne hêja ye.
EM FEDAIYÊN RÊBER APO NE
Weke gerîlayên ku niha li qada şer in, em kêlî bi kêlî li êrîşên nemerdane yên derveyî exlaqê yên dijmin rast tên. Em rûyê mêtingeriyê yê dewleta Tirk baş nas dikin û roj bi roj dibînin. Bila kesek teslîmiyeteke bêrûmet li me ferz neke. Em vê qebûl nakin. Em ji her demê bêhtir ji azadiyê, çareseriya demokratîk û aştiyeke bi rûmet re amade ne. Lê belê bila kes ne neşibîne nokerên xwe. Em Kurdên berê nînin. Em mirovên polîtîk ên zane ne. Em fedaiyên Rêber Apo ne. Bila kes bi şaşitî nêzî me nebin. Em careke din dibêjin; divê azadiya fîzîkî ya Rêber Apo pêk were.
Gelê me wateyeke gelekî girîng li Newroza îsal kiriye. Konseya me ya Fermandariyê ya HPG’ê civîna xwe ya salane pêk anî û encamên wê gihîştin me. Bi rojan e em li ser vê nîqaş dikin, kûr dibin û xwe amade dikin. Me xwe di doktrîn û perspektîfa gerîlayê demê de kûr kirine. Em êrîşî kesî nakin. Lê belê kî êrîşî me bike, em ê bi rengê herî tund bersivê bidin. Em ê ti carî bêbersiv nehêlin. Bila kes ne li bendê be ku em teslîmî dewleta Tirk bibin. Eger wê aştiyeke bi rûmet, çareseriyeke demokratîk û azad hebe, em jê re amade ne. Lê belê ji her demê bêhtir em xwedî wê hêzê ne ku xwe, destketiyên xwe û gelê xwe biparêzin. Ev Newroz wê bibe Newroza azadiya fîzîkî ya Rêber Apo, azadiya Kurdistanê û gelê herêmê. Em gelê Kurd ê bi rûmet silav dikin. An Azadî An Azadî. Bijî Serok Apo.”
