Meclisa Kongra Star a bajarê Kobanê di çarçoveya bernameya 8’ê Adarê Roja Jinan a Cîhanê de meşek ji bo piştgiriya YPJ’ê lidar xist. Meş bi dirûşma “Bi hûnandina keziyên jinan, şoreşa mirovahiyê tê parastin” bi tevlêbûna bi sedan jinan, şervanên YPJ, Asayîş û endamên tevger û rêxistinên jinan li qada Jina Azad a bajarê Kobanê destpê kir.
Di meşê de alên YPJ’ê û Kongra Star hatin hildan û bê navber dirûşmên “Bijî berxwedana YPJ`ê” , “Berxwedan jiyan e”, “Jin Jiyan Azadî” û “Bijî berxwedana Rojava” hatin berzkirin.
Meş li qada Şehîd Egîd weguherî mitîngê û ji bo bîranîna şehîdên azadiyê deqeyek rêz hat girtin. Ji rêveberên Hêzên Ewlekariya Hundirîn a bajarê Kobanê Arîn Kobanê axivî û wiha got: “Di şexsê şehîdên jin de em hemû şehîdên azadiyê bi bîr tînin û bejna xwe bi rêzdarî li hemberî giyanên wan ditewînin. Di şexsê YPJ`ê de em bûn hebûn û Kurditanî. Hemû jinên berxwedêr bê navber tê dikoşin. Em wek jinên Kobanê ji kela berxwedanê silavên xwe ji Rêber Apo re dişînin ku rêya azadî û berxwedanê nîşanî me daye. Em Hêzên Ewlekariya Hundirîn û şervanên YPJ’ê wê li ber xwe bidin hata ku mafên me yên rewa di destûra Sûriyeyê de werin misogerkirin.”
Arîn Kobanê anî ziman ku wê ji bo parastina destkeftiyên Şoreşa Rojava û azadiya jinan têkoşînê bidomînin.
Mitîng bi dirûşma “Berxwedan jiyan e” û “Bijî berxwedana YPJ`ê” bi dawî bû.
