Dewleta Tirk û çeteyên wê êrîşeke hovane li seranserî Kobaniyê daye dest pêkirin. Li dijî van êrîşan şêniyên herêmê ji 7 salî heta 70 salî ji bo parastina ax û rûmeta xwe li ber xwe didin. Jinên ku tevlî banga seferberiyê bûne diyar kirin ku ew ê heta dawiyê li ber xwe bidin.
Hevseroka Desteya Ciwan û Werzîşê a Kantona Firatê Avaşîn Misto, anî ziman ku çi dibe bila bibe, ew ê heta dawiyê xwedî li Kobanê derkevin û wiha got: “ Em li her derê li ser piyan in. Em hemû di nava seferberiyê de ne. Êdî gav gava rûmetê ye, êdî em ê xwe îsbat bikin, li her derê Kurdisatnê gel rabûye ser piyan. Dîwaran hildiweşîn in. Em ê jî bi wî ruhî, hêrsa xwe ya li hemberî dagirkeriyê raber bikin. Dive êdî her kes ji bo Kurdewariya xwe rabin ser piyan.”
Avaşîn Misto dibêje ger Kurdek jî bimîne wê îsrara wan ya berxwedanê her biçe mezintir bibe û wiha domand, “Em teslîmetiyê qebûl nakin. Em ê rabin ser piyan. Em bang li ciwanan dikin û bang li hemû jinên azad dikin ku êdî rabin ser piyan û em li hemberî dagirkeriyê serî hildin.”
Endama Kongra Star Nadiya Hiso jî got, “Hebûna me hebûna Kurdistanê ye, em bang li her kesî dikin ku rabin ser piyan Kurdek li kur be divê xwedî li destkeftiyên Rojava derkevin. Desthilatdarî jî dixwazin wê rûmetê têk bibin. Lê em hene û em ê hebin. Îro zarokên me li çeperanin û berxwedaniyê dikin. Çawa me DAÎŞ’ê têk bir û me hemû mirovahî parast. Îro careke din ev hov tên û dixwazin tola xwe hilîn in. Ew qatilin û ew dixwazin însaniyetê ji erdê rakin.”
Nadiya Hiso anî ziman ku ev êrîş ji aliyê dewleta Tirk û çeteyên wê tên kirin û got: “Ev êrîşana bi destê dewleta Tirk e, em ê hemû rabin ser piyan. Îro em ê hebûna xwe biparêzin. Kobanê rûmeta tevahî cîhanê diparêze û hemû cîhan jî xwe bêdeng kiriye. Em ê bi têkoşîna xwe bibin kulîlkên azadiyê û bi ser bikevin.”
