Platforma Çalakiyên Hevbeş a Tevger û Rêxistinên Jinan li Rojava bi daxuyaniyekê kampanyaya piştgiriya Yekîneyên Parastina Jin (YPJ) û daxwaza beşdariya wê di entegrasyonê de, da destpêkirin.
Daxuyanî li Stadyuma Şehîdên 12’ê Adarê ya li bajarê Qamişloyê bi amadebûna bi dehan jinan, endamên tevger û rêxistinên jinan, nûnerên partiyên siyasî, hiqûqnas, rewşenbîr û çalakvan hat dayîn.
Daxuyanî bi zimanê kurdî ji aliyê berdevka Kongra Star a bajarê Qamişloyê Rîhan Temo ve, bi erebî ji aliyê cîgira seroka Desteya Jinan a Herêma Cizîrê Wesayîf Dendea ve, her wiha bi zimanê suryanî ji aliyê endama Yekitiya Jinên Suryan Semîra Gewriyê Hena ve hat xwendin.
Di kombûnê de alên Kongra Star û YPJ’ê hatin hildan û pankartên bi nivîsên “Em hemû YPJ ne” û “YPJ nûnertiya me dike” hatin vekirin.
Piştî ragihandina kampanyayê, bername jî bi raya giştî re hate parvekirin.
Li gorî bernameya ku ji aliyê Wesayîf Dendea ve hatî ragihandin, wê li welêt û dervey welêt konser bên lidarxistin, wê pêşangehên wêneyên şervanên YPJ’ê bên vekirin û şano bên pêşkêşkirin.
Ji xeynî vê wê çalakiyên olî bên lidarxistin, wê li ser navê Dayikên Aştiyê, şehîd û şervanan daxuyaniyek were dayîn.
Bi tevlîbûna hiqûqnasan wê li ser girîngiya YPJ’ê panel bên lidarxistin, wê bi akademîsyenan re hevdîtin were kirin.
Her wiha ji bo YPJ di entegrasyona mekanîzmaya parastinê de cih bigire, wê civîn bên lidarxistin û têkildarî belgekirina sûcên şer dosya bên amadekirin.
Di çarçoveya kampanyayê de wê li ser medyaya dîjîtal xebatên berfireh, bên meşandin.
