Di çarçoveya bersivdana banga seferberiya giştî ya Meclisa Taxên Şêxmeqsûd û Eşrefiyê yên bajarê Helebê de gel û ciwanên bajarên Cizîrê li ser pêyan in.
QAMIŞLO
Tevgera Ciwanên Şoreşger a Sûriyeyê û Tevgera Jinên Ciwan ên bajarê Qamişlo ya kantona Cizîrê ya Bakur û Rojhilatê Sûriyeyê, bi daxuyaniyekî ji bo piştgiriya taxên Şêxmeqsûd û Eşrefiyê yên Helebê seferberî îlan kirin.
Ciwanan bi rext û çek dirûşma “Şêxmeqsûd bi te re heta mirinê” berz kirin.
Daxuyanî ji aliyê endamê Tevgera Ciwanên Şoreşger a Sûriyeyê Çiya Rizgar ve hat xwendin. Çiya diyar kir ku ew bangawaziya gelê xwe yê Şêxmeqsûd û Eşrefiyê bi cih tînin û wiha axivî: “Ji bo parastina gelê xwe em erkê xwe yê dîrokî pêk tînin. Em ji bo parastina gelê xwe û herdu taxan beşdarî seferberiya serdema dîrokî dibin. Em bang li tevayî ciwanan dikin ku helwesteke şerê şoreşgerî nîşan bidin.”
Daxuyanî bi dirûşma “Ji bo Şêxmeqsûd şer, şer, şer” û “Bijî berxwedana Şêxmeqsûd” bi dawî bû.
HESEKÊ
Bi dehan endamên ciwanên şoreşger li Çerxerêya Kevokê ya bajarê Hesekê yê kantona Cizîrê bi daxuyaniyekê banga seferberiya giştî ya Meclisa Taxên Şêxmeqsûd û Eşrefiyê da. Endama rêveber a Tevgera Ciwanên Şoreşger a Sûriyeyê Lîlava Xalid daxuyanî xwend.
Di daxuyaniyê de hat diyarkirin ku ciwanên şoreşger ên bajarê hesekê bersiv da banga Meclisa Taxên Şêmxeqsûd û Eşrefiyê û amadekariya pêkanîna erka xwe ya dîrokî ya parastina gelê wan taxan nîşan da.
Ciwanan di daxuyaniyê de destnîşan kir ku pêdiviya qonaxa heyî bi yekgirtinê heye û bang li ciwan û tevahî gelan kir ku li hember van sûcan destekê bidin gel.
GIRKÊ LEGÊ
Bi heman mijarê, ciwanên bajarê Girkê Legê bi erebeyan ji Qada Şehîd Xebat ve çalakî li dar xist, li tevahî kolanên bajêr geriyan. Ciwanan siloganên “bijî berxwedana Şêxmeqsûdê” bilind kirin.
TIRBESPIYÊ
Bi dehan şêniyên Tirbespiyê li pêşiya Şaredariya Gel kom bûn û piştgirya xwe ji bo taxên Helebê ragihandin. Di meşê de nûnerên saziyên civaka sivîl, partiyên siyasî û bi dehan şênî tev li çalakiya bi erebeyan hatiye li dar xistin li kolan û tevahî bajêr hatin gerandin, bûn.
ŞEDADÊ
Gelê bajêr û bajarokên wê bi armanca bersivdana banga seferberiya giştî ya ku Meclisa Taxên Şêxmeqsûd û Eşrefiyê kiriye xwepêşandanek li dar xist. Li gel avahiya Partiya Yekitiya Demokratîk (PYD) xwepêşandan veguherî mitîngê. Li wir rêveberê Meclisa Bajêr Mihêdî El Dixêm axiv. El Dixêm êrişên li dijî taxên Şêxmeqsûd û Eşrefiyê şermezar kirin.
Xwepêşandan bi diruşmên “gelê Sûriyeyê yek e”, “Bijî berxwedana Şêxmeqsûdê” bi dawî bû.
