Karwana Dayikan a ku ji bo xurtkirina hevgirtina bi Rojava re balê bikşîne ser polîtîkayên ambargo û dorpêçkirina li ser Kobanê û daxwazên jinan a aştiyê bidin xuyakirin ji bajarê Heilbronn ê Elmanya derket rê li rawestgeha sêyemîn Darmstadtênbi eleqeyek mezin hat pêşwazîkirin.
Karwana ku di 13’ê Hezîranê de bi mitînga li Heilbronnê dest bi gera xwe ya Elmanyayê kir, têkoşîna jinan li Rojava û ezmûna jiyana demokratîk a gel li bajarên tê re derbas dibin ji raya giştî re vedibêjin.
Hejmareke mezin ji saziyên demokratîk, rêxistinên jinan, nûnerên partiyên siyasî û parêzvanên mafên mirovan beşdarî mîtînga li Meydana Luisenplatz ku yek ji cihên navendî yên Darmstadtê ye, bûn. Bi zimanên Kurdî û Elmanî axaftin hatin kirin û bal kişandin li ser mafên jinan, demokrasî û aştiyê.
Di mîtîngê de dirûşmeya “Jin, Jiyan, Azadî” hat berzkirin û peyamên hevgirtina bi gelê Rojava re hatin dayîn.
ŞAREDAR PEYAMA HEVGIRTINÊ DA
Şaredara Darmstadtê Barbara Akdenîz axivî û bal kişand ser gefên cidî yên li ser mafên jinan ên li çaraliyê cîhanê. Barbara Akdenîz li ser girîngiya parastina mafên jinan û mafên mirovan rawestiya.
Janine Wissler di mitîngê de axivî û diyar kir ku ew bi gelê Kurd re di nav hevgirtinê de ne. Janine Wissler anî ziman ku divê siyasetmedarên Kurd ên girtî werin berdan.
Tê payîn ku rawestgeha din a Karwana Dayikan bajarê Kasselê be.
