Tevgera Çand û Hunera Demokratîk a Mezopotamyayê (TEV-ÇAND) di sala 2016’an de hate avakirin. Armanca vê tevgerê pêşvebirina çand û hunerê li ser bingeha demokratîk, şoreşgerî û çanda neteweyî ye. TEV-ÇAND, ji bo pêşkeftina huner û çanda kurdî bûye destkeftiyek mezin, her wiha ji bo civakê bûye mîna dîrokek hunerî.
Ruxmî êrîşên ku di vê dema dawî de li ser herêma Bakur û Rojhilatê Sûriyeyê qewimîn TEV-ÇAND hîn bêhtir hunera xwe mezin kir û ji bo berxwedaniya gel bû neynik.
Têkildarî zehmetiyên heyî li ser çand û hunerê Hevserokê Tevgera Çand û Hunera Demokratîk a Mezopotamyayê (TEV-ÇAND) ya Kantona Cizîrê Keder Hisên ji ajansa me re axivî.
Keder da zanîn ku Tevgera Çand û Hunera Demokratîk a Mezopotamyayê TEV-ÇAND ji destpêka Şoreşê ve ye û hemû cûreyên hunerên şoreşgerî em tê de pêşkêş dikin û wiha got: “Bi banga dîrokî ya Rêber Abdullah Ocalan ya ji bo tevahî Kurdistanê û çareseriya pirsgirêka Rojhilata Navîn em wek tevgerek hunerî bi hêz bûn. Her wiha em bi hemû hêza xwe dixwazin bi hunerî berxwedaniya gel û şervanên xwe derxînin holê. Di heman demê de bi stran û çalakiyên xwe yên hunerî em dikarin bibin deng û rengê rastiyê ji ber ku huner asta herî bilind a di civakê de ye.”
‘ÇALAKIYÊN ME HÎN BÊHTIR BI HÊZ DIBIN’
Keder diyar kir ku ruxmî şerê ku li ser herêma Bakur û Rojhilatê Sûriyeyê heye lê belê hunera xwe ranawestînin û roj bi roj gurtir dikin û wiha pêde çû: “Di salê de em gelek çalakiyan lidar dixin, mînak wek, çalakiyên Newroz, Mihrîcana Şehîd Yekta Herekol, Mihrîcana Orkêş, 4’ê Nîsanê, 1‘ê Gulanê û Mihrîcana Govendê. Ev wek plansaiyên heyî di salê de ku TEV-ÇAND pê radibe. Her wiha kesên ku di nav van çalakiyan de cihê xwe digirin tevahî ji hundirê Sûriyeyê û derveyî Sûriyeyê ne jî.”
HUNERA BI ŞEHÎDAN AVA BIBE TI CAR TÊK NAÇE
Keder wiha behsa êrîşên dewleta Tirk a dagirker kir û got: “Dewleta Tirk a dagirker bi awayek hovane êrîşî Bendava Tişrîn dike û bi hemû teknîkên xwe li dijî sivîlan şer dike. Rûxmî vê yekê jî gelê me û şervanên me berxwedanî dikin û nahêlin ku bendava wan ji dest wan here. Me xwest vê berxwedaniya dîrokî ya nobeta li Bendavê û hêza şervanên xwe belge bikin û bikin stranek dîrokî. Bila dijmin ne fikire bila baş bizane ku hunera me jî hunerek şoreşgerî ye û ti car wê ti kes nikaribe hunera me bişkîne. Hunera ku ji Şehîd Mizgîn, Sefqan û heya Bavê Teyar dewam kir, ne hindike û pir bi nirxe.”
‘HUNERMEND ŞERVANÊN GEL IN’
Keder anî ziman ku hunermendên zîrek ewin ên ku agirê azadiyê ji gelê xwe re pêdixin û serpêhatiyên gelê xwe derdixînin holê. Keder wiha axaftina xwe dewam kir û got: “Em gelê Kurd aşiqê azadiyê ne û mînaka herî berbi çav Bavê Teyar e. Hunermend şervanên gel in, şervan jî hunermendên gel in. Rêber Apo wiha dibêje em jî li gor vê gotinê derdikevin. Em bi berhemên xwe û govenda xwe dîrokê dinivîsin. Hunera me ne ji bo qezenckirina pereyan na, lê belê hunera me ji bo welat û gelê me ye. Em ti car şehîdên xwe ji bîr nakin û em her tim dibêjin şehîdên me bûn sedema hebûna me, xeta me ya têkoşînê her tim xeta Rêber Apo û şehîdên me ye.
Em wek Tevgera Çand û Hunera Demokratîk a Mezopotamyayê TEV-ÇAND li hember tevahî tevlîheviya heyî jî li ber xwe didin û berhemên xwe pêşkêş dikin. Hêviya me jî ew e ku em bi berhemên xwe bibin deng û rengê civaka xwe.”
