Li bakurê Sûriyeyê, di demeke ku di navbera QSD û HTŞ a rêveberiya Şamê de pevçûn berdewam dikin de tevî ku agirbest hatiye ragihandin jî binpêkirinên komên çete yên HTŞ’ê didomin. Hevberdevkê Kongreya Demokratîk a Gelan (HDK) Alî Kenanoglu tiştên diqewimin nirxand û got ku ev rewş ne tenê pevçûnek leşkerî ye, di heman demê de modela rêveberiya demokratîk a li ser bingeha îradeya gelên Rojhilata Navîn hedef digire.
Kenanoglu diyar kir ku ev avaniya ku ji hêla hêzên Rojavayî û Îsraîlê tê piştgirîkirin wê aştiyeke mayînde çêneke û destnîşan kir ku feraseta yekreng û xwe dispêre destwerdana derve wê li Sûriyeyê bingeha pevçûnên nû biafirîne.
‘ROJAVA DEMOKRASIYÊ LI ROJHILATA NAVÎN NAXWAZE’
Alî Kenanoglu diyar kir ku li Rojhilata Navîn di demên de pevçûnên di navbera QSD û HTŞ’ê de diqewimin, hevsengiyên herêmî û navneteweyî ji nû ve nîqaş dike. Kenanoglu anî ziman ku hêzên Rojavayî modela siyasî ya li ser bingeha xwerêveberiya gel wekî gef dibînin û wiha domand:
“Emerîka, Ewropa, aliyê Rojava naxwazin li erdnîgariya Rojhilata Navîn pergalek ku li ser bingeha serweriya gel û gel xwe birêve bibin were avakirin. Nûnerê Amerîkayê Tom Barak ev yek pir zelal anî ziman. Ji aliyê Ewropa û Amerîkayê ve dixwazin ku ev welat ji hêla rêberên ku li gorî berjewendiyên wan in bê birêvebirin; armanca wan ew e ku erdnîgariya Rojhilata Navîn bi vî rengî were teşekirin.
Li Rojhilata Navîn jixwe du aktorên sereke hene. Yek ji wan pergalek rêveberiyê ye ku li ser bingeha kevneşopiya olî, dîrok û temsîliyetê ye, wekî li Îranê. Ya din jî şêweyên rêveberiyê yên eşîrî û malbatî ne. Berevajî vê li herêma Rojava, wekî pêwîstiya demokrasiyê hemû beşên civakî yên ku li wir dijîn – Ereb, Kurd û yên din – têne temsîl kirin.” Têgehek rêveberiyê heye ku Elewî, Tirkmen, Xiristiyan, Suryanî û Ermenî dikarin xwe birêve bibin û li dora destûrek yek bibin.
Ev tablo ji bo Rojavayî xetereyek xeternak çêdike. Ji ber ku di pergala ku mirov dikarin rêberên xwe diyar bikin û hilbijêrin de rêberên ku dibin kuklayên Rojavayî û welatên emperyalîst dernakevin. Dema ku diguhere wê gavê hilweşînin. Ji ber vê yekê, rêveber neçar in ku li gorî berjewendiyên welatên xwe û gelê xwe tevbigerin. Ji ber vê yekê Rojavayî vê pergalê naxwaze.”
‘MESELE BI TEVAHÎ EWLEHIYA ÎSRAÎLÊ YE’
Kenanoglu destnîşan kir ku pêşketinên li herêmê ji hêla destwerdanên hêzên Rojavayî ve têne şekildan û diyar kir ku avaniya ku li Şamê hatiye damezrandin ne li ser îradeya gel, li ser berjewendiyên ewlehiyê yên Îsraîl û Rojavayî hatiye avakirin û wiha pê de çû:
“Em hemû dizanin û me pir baş dît ku HTŞ li Şamê bi pejirandina Emerîka û piştgiriya Îngilistan û Fransayê projeyek Îsraîlê ye û di serî de ji bo ewlehiya Îsraîlê hate sazkirin. Di encamê de tiştê ku îro diqewime vê yekê bi zelalî nîşan dide.
‘EV REWŞ WÊ NEÇARESERIYÊ BÎNE’
Alî Kenanoglu bal kişand ser wê rastiyê ku pêşketinên leşkerî û siyasî bi rêya hevpeymaniyên demkî li qadê têne kirin û anî ziman ku ev pêvajo wê ji bo gel çareseriyek mayînde çêneke û wiha berdewam kir:
“Niha, bi piştgiriya Emerîka, Ewropa, Rojavayî; bi piştgiriya Îsraîlê dibe ku çeteyên HTŞ’ê van tiştan dike. Lê ev rê û rêbazek ji bo çareserkirina pirsgirêkên mayînde yên li Sûriyeyê nabe. Ew ê ji bo gel bextewarî û aştiyê neyne. Berevajî vê, ev feraseta yekreng dê bibe sedema ku pirsgirêkên li wir mayîndetir û kûrtir bibin.
Ev tê vê wateyê ku her cûre alozî û pevçûn wê li wir berdewam bikin. Mixabin, rewş ev e. Niha, piştî Elewî û Durzî, êrîşên li dijî îrade û qadên jiyanê yên gelê Kurd jî dest pê kirine. Her çiqasî niha agirbest heye jî, hemû axaftin, hemû gotinên hatine gotin û hemû gefên hatine kirin nîşan didin ku li ser vê mijarê lihevkirinek tevahî hatiye kirin. Mixabin, xuya dike ku êrîşên li dijî gelê Kurd li wir wê nesekinin.”
‘EM Ê BERTEKA XWE YA LI DIJÎ VÊ NÊZÎKATIYA TEKPARÊZÎ NÎŞAN BIDIN’
Alî Kenanoglu nêzîkatiya HDK’ê ya li herêmê bi bîr xist û diyar kir ku pergala demokratîk a li ser îradeya gel rêya tekane ya aştiya mayînde ya Tirkiye û Sûriyeyê ye û ev tişt got:
“Wekî HDK’ê me ji destpêkê ve her tim diyar kiriye ku em alîgirê avakirina pergalên li Rojhilata Navîn – Tirkiye û Sûriyeyê jî di nav de- ne ku gel dikarin bi awayekî demokratîk, wekhev, azad û adîl bijîn.
Di sala dawî de, nemaze bi destpêkirina pêvajoya aştî û civaka demokratîk li Tirkiyeyê, em xebata ku pêvajoyê bigihînin civakê dimeşînin. Em civînên gel li dar dixin; me konferans, semîner û gelek çalakî li dar xistine. Bi vî awayî helwesta xwe ya ji bo avakirina pergalek hem ji bo Sûriye û hem jî ji bo Tirkiyeyê didomînin ku mirov bikaribin li gorî îrade û hilbijartinên xwe bijîn.
Wekî HDK em ê sibê li Pirsûsê bin. Duh em li Deriyê Sînor ê Yayladagê bûn; niha em diçin Pirsûsê. Li wir, em ê berteka xwe li dijî vê têgihîştinê nîşan bidin. Em ê bertekên xwe yên demokratîk li dijî vê zîhniyeta dagirker, vê nêzîkatiya ku gelan paşguh dike, cudahiyan înkar dike û yek îdeolojiyê li ser hemû gelên Sûriyeyê ferz dike nîşan bidin.”
