Komîteya Çand û Hunerê ya Kevana Zêrîn bi daxuyaniyekê hunermenda şoreşger Delîla Meyaser (Şenay Goçer) a ku 24’ê Tebaxa 2007’an şehîd bû, bi bîr anî.
Daxuyaniya Kevana Zêrîn bi vî rengî ye:
Bibîranîn helwesteke hişmendiyê ye û di cewherê xwe de nîşan dide bê havêneke çawa di rêveçûnên dîrokî de hatiye meyandin. Bibîranîna şehîdan havênê herî bi nirx, herî pîroz û herî watedare ku me gihandine heta roja me ya îro û xwedî wê hêzê ne ku bigihînin dahatuyên bi hêviyê dagirtî. Ji ber vê em di 18’emîn salvegera şehadeta rêheval, hozan, têkoşer û jina çeleng Delîla Meyaser a tevgera azadiyê de wê bi rêz, bi eşq û bi hezkirineke bê dawî bibîr tînin.
‘ŞOREŞGERIYA XWE BI HUNERMENDANE PÊK ANÎN’
Di 18’emîn salvegera şehîdbûna hevala Delîla Meyaser de, em di kesayeta wê de tevahî şehîdên rêya azadî û nirxên civaka jin-dayikê ku bi hunera xwe hunandine bibîr tînin. Bi eşq di vê rêgehê de meş û xwebûna xwe avakirinê herî bedew di kesayetên van şoreşgerên hunermendan de derkete holê. Navê vê xwebûnê Şehîd Mizgîn, Sarya Baran, Viyan Peyman, Berçem Efrîn, Jinda Hewlêr, Ronahî, Arjîn, Şoreş û Delîla Meyaser bûn. Di kesayetên van hevalan de rêz û hezkirina me ya ji bo tevahî canbexşên rêya azadiyê di asta lutkeyê de ye. Şoreşgeriya xwe hunermendane pêk anîn.
Havênê heqîqetê hunere û ji kêliya niqitîna heqîqetê û heta roja me ya îro, ev havên her çûye wateya xwe bêtir nîşan daye. Ferqa herî mezin a serpêhatiya mirovahiyê di vê xalê de veşartiye. Kirdeyê vê serpêhatiyê jî hunermende. Xwebûna bi wate, lêgerîna heqîqetê û eşqa çêkirinê xwe bi awayê herî tîr di kesayetê lêgerînvanên ên ku dixwazin bi awayê hunermendane bikin pêk tê. Ev eşq ne di zeman de û ne jî di mekan de sînoran nas nake. Ji ber vê ev hin caran dibe lutkeyên çiyayan û hin caran jî dibe taritiya zindanan. Lê li ku derê dibe bila bibe eşqa heqîqet û wateyê xwe di destê wan de dide avakirin û em jî nav lê dikin dibêjin hunermend.
‘LI LUTKEYÊN ÇIYAYAN OLAN DA Û XWE BI ÇIYAYAN RE AVA KIR’
Sembolek ji sembolên vê heqîqetê ya ku li lutkeyên çiyayan olan da û xwe bi çiyayan re ava kir Heval Delîla Meyaser e. Bi dengê xwe yê ku banga azadiyê bû, çizirî nav dil û mejiyê me. Xwedî helwêsta dîrokî bû. Li hember komploya sala 1999 a li dijî Rêber Apo pêk hatibû, li mala xwe 28 rojan çalakiya birçîbûnê pêk anîbû lê vê têrker nedît û berê xwe da çiyayan ku ji bo xwe çêkirinê qadên bêhempa bûn. Li vir bi çanda qedîm a jin-dayik û berxwedêriyê re xwe û dengê xwe bi heqîqetê stirand û wate da dengê xwe. Bi vî awayî rêwitiya xwe ya herî bedew pêk anî. Çiyayên serberz şahidên vê ne, şevên bi raz pê re axivîne, rêhevalên wê nav û dengê wê weke nivişteke ji dilê jin-dayikê derketî di singa xwe de dihewînin û xewn û xeyalên wê hê jî li esmanê welêt difirin.
Ev rêwitiya ku bi bedewî û heqîqetê hunandî, 24’ê Tebaxa 2007 Heval Delîla di nav karwanên pakrewanan de berdewam kir. Li Kela Memê di encama pevçûneke bi artêşa Tirk re, ew û 11 rêhevalên xwe dibin neferên bêaman ê vê karwanê. Di kesayetên Rêheval Roza û Avesta de jî, tevahî 11 pakrewanên rêya heqîqetê bi rêzdarî bibîr tînin, bejna xwe li hember bîranîna wan ditewînin û ji bo armancên wan ên jiyaneke bi rûmet weke hevrêyên wan, hevsoziya xwe her nûjen dikin.
‘ŞEHÎD DELÎLA MEYASER RÊNÎŞANEYA ME YA RÊYA HEQÎQETÊ YE’
Em dibinin rêwitiya wê di her rêhevalekê de berdewam e, deng û dahola wê di nav çiya û zinaran de, di nav deşt û zozanan de olan dide. Hêvî û armancên wê, bi hêvî û armancên her rêhevalekê de di nav hev de berdewam in. Di 18’emîn salvegera şehadeta wê de, em weke Tevgera Çand û Hunerê ya Kevana Zêrîn li pey vê hêza ku me ji şehîdên bêhempa girtiye, di kesayeta Şehîd Delîla Meyaser de soza bicîhanîna armancên wan didin. Rênîşaneyên me yên heqîqetê ne. Şopdariya vê rênîşaneyê wateya me ye.”
