Komalên Jinên Kurdistan (KJK) li dijî êrîşên HTŞ’ê yên di demên dawî de li Sûriyeyê zêde bûne, daxuyanî da raya giştî û destnîşan kir ku HTŞ weke versiyoneke nûbûyî ya DAÎŞ’ê li herêmê şerên li ser esasê mezhebî, etnîk û zayendparêz gur dike, hêzên hegemon li pişt vê çêkerê ne.
KJK’ê diyar kir ku ev çêkerên cîhadîst ên ku li herêmê fealiyetên DAÎŞ’ê didomîne, ji aliyê hêzên ku dixwazin statukoya netew-dewletê biparêzin ve tên destekkirin û ragihand ku Sûriye bûye qadeke nû ya şerê qirêj.
KJK’ê li dijî van êrîşan bang li civaka navneteweyî û gelan kir ku bikevin nava liv û tevgerê.
Daxuyaniya KJK’ê bi vî rengî ye:
“Rastiya HTŞ’ê ku dewama êrîşkariya DAÎŞ’ê ya li ser şoreşa Kurdistanê û Rojhilata Navîn hatî ferzkirin e, îro li Sûriyeyê pêvajoyeke nû ya bixwîn gur dike.
DAÎŞ ji bo bi dawîkirina hêrs û serhildana gelan a li dijî netew dewletên statukoger, hatibû avakirin.
Ev aparata bixwîn a hêzên sermayeya kûreyî, îro jî weke darbeyekê li dijî gelan didome.
Hêzên ku bi konsepta hêza hegemonîk tevdigerin, dixwazin Sûriyeyê bikin qada şerê qirêj. Li Sûriyeyê agahiyên komkujiyan, roj bi roj zêde dibin. Divê ev baş were zanîn, HTŞ nixumandinek e, di esas de yên li qadê şer dikin hêzên hegemonîk in.
Tevgera Azadiya Kurd çêkera xwe ya serweriya dinamik a li qadê xurt dike, gelên Sûriyeyê Kurdan weke hêviya rizgariyê dibînin û hevsengiyên hêzê yên nû yên li herêmê, lêgerînên nû yên ji bo çareseriyê jî aniye rojevê. Kurd ji bo lêgerîna çareseriyê bûne aktorê sereke û vê yekê hêzên ku ji rewşa kaotik tîmar dibin, hîn zêdetir êrîşkar kiriye.”
KJK’ê di daxuyaniya xwe de ragihand ku hêzên hegemonîk û çêkerên desthilatdariya navendî kaosa li herêmê kûrtir kirine û ji vê zêdetir ti rola wan a din nîne û destnîşan kir ku tişta ji bo gelan pêwîst, çareseriya Netewa Demokratîk e.
KJK’ê got, “Şoreşa gelên Rojava û jinan ku 13 sal li pey xwe hiştin, hîn jî çavkaniya hêvî û kelecanê ye. Şoreşa Rojava hemû rastiyên ku sedemê şer û komkujiyê ne, di nava xwe de gihand çareseriyê û ji bo jiyana hevpar, bûye mînakek şênber.
Îro hêzên cîhadîst dixwazin gotinên mezhebî di nava Sûriyeyiyan de belav bikin, ev yek rê li ber komkujiyên nû vedike. Ev rewş hilweşîner e, ev gotin û hewldanên nefretê dibe ku dewlemendiya civakî û çandî ya Sûriyeyê tune bike. Êrîşên li hemberî Durziyan, dewama komkujiya li hemberî Elewiyan e. Şerên etnîkî û şerên dînî, desthilatdariyê tîmar dike. Lê ya ji bo gelan û jinan pêwîst, mafên zagona bingehîn û sîstema jiyana demokratîk e.”
KJK’ê diyar kir ku ev çêkera di bin “fermandariya Colanî” de, ne rewa ye û ev bang kir: “Divê hemû hêzên navneteweyî, demokratîk, sosyalîst û jin li dijî rêveberiya Colanî ya cîhadîst helwest nîşan bidin. Tê xwestin ku gelê Ereb jî bikêşin nava vê xefika bixwîn, divê gelê Ereb ji vê lîstokê re bêjin êdî bes e.
Weke KJK em dibêjin ku yekane rêya ku ji bo gelên Sûriyeyê bibe serketin, çareseriya Netewa Demokratîk e.
Ji bo ku pêkanînên dermirovî yên bi serê jinên Êzidî û jinên Elewî pêk hatî, di nava civaka Durzî de jî dubare nebe, divê hemû çêkerên jinan têkoşîna hevpar bilind bikin.
Em bang li hemû jinên Kurd, Ereb, Çerkes, Tirkmen, Sunnî, Elewî, Êzidî û Durzî dikin ku li dijî şer bi rengekî hevpar tevbigerin û têbikoşin.”
