Di nava civakeke ku bi hezaran reng têde jiyan dike de, yek civak dihat pejrandin ew civak serweriya xwe li ser her netewê din dida ferzkirin. Di nava Sûriyeyê de jin di her warê jiyanê de hatibû qutkirin. Di nava Civaka Kurd a li Sûriyeyê de jî, jin di nava malê de bi sernava ‘Her tişt Eybe’ di nava xanî de dihat dorpêçkirin.
Di dîroka dûr û dirêj a ku ji civaka xwezayî dest pê dike de, di wê demê de jin xwediyê taybetmendiyên xwedawendan bûn û ew bi xwe pêşengên civaka xwe bûn û civaka xwe di nava dadwerî û edaletê de bi rêve dibirin. Civaka ku têde jin pêşeng e, ew civak jî teqez ber bi serkeftina mutleq ve diçe.
Gelek jinên pêşeng li hemberî desthilatdariyê rabûn, gelek jinên şoreşger serî li hemberî vê fikra desthilatdar rakirin û gelek jin jî bûn mînaka şoreşê. Roza Luksemborg, Clara Zetkîn û gelek jinên ku di dîrokê de navê wan hatiye nivîsandin, hene.
Jin li hemberî desthilatdariyê rêya wekhevî û edaletê dipejirîne, li hemberî feodalatiyê, rêya aştî û aramiyê qebûl dike û li hemberî tunebûnê radibe û dibêje em hene mînaka wê jî şoreş û serhildana ku ji Rojhilatê Kurdistanê destpê kir û veguherî tevahî cîhanê, cîhan giştî di bin dirûşmeya ‘Jin Jiyan Azadî’ de hejiya.
Dîsa jî li hemberî her desthilatdariyê, jina Kurd di her warî de dibe mînak û ew li cîhanê belav dibe. Ji Kobanê çirûsk dest pê kir û niha her derê Kobanê bi rengê Kesk, Sor û Zel xemiliye. Ev yek serketina li dijî çeteyên DAÎŞ’ê û hevkarên wan e.
Ji wê çaxê de Kobanê bu yekem bajarê Kurdistanê yê rizgarkirî û piştre jî tevahî Rojava, bajar bi bajar ji destê hikumeta dîktator hat rizgarkirin. Êdî gel di nava civaka xwe de xwe bi rêxistin kir û dest bi kar û xebatên xwe kirin. Jinan ji xwe re navendek a bi navê Mala Jin ava kirin ku cara yekem li Qamişlo dûra jî li Hesekê, Efrîn û belavî tevahî bajarên Rojava bûn. Niha bi dehan sazî, tevger û komeleya jinan li ser xaka Rojavayê Kurdistan-Bakur û Rojhilatê Sûriyeyê hene.
Hevseroka Desteya Kar û Barên Kedkaran a Kantona Firatê Felek Yûsif salvegera 13’emîn a şoreşa 19’ê Tîrmehê li şehîdên azadiyê pîroz kir û ev tişt anî ziman: “Çirûska 19’ê Tîrmeha 2012’an li Kobanê hat vêxistin û destpê kir. Me ji xwe re xeta sêyemîn hilbijart û dest bi şoreşê kir. Em bi hêza xwe li Cîhanê tên naskirin. Me rejîma Baas’ê di 19’ê Tîrmeha 2012’an de ji Kobanê derxist û bi vî awayî dest bi şoreşê hate kirin. Dema ku em behsa wê rojê dikin wek xeyalekê bû ji me. Bajarekî wek bajarê Kobanê ji bin hukmê rejîma Baas’ê hat xilaskirin.”
‘ME SERÎ LI DIJî DESTHILATDARIYÊ HILDA’
Di dewama axaftinê de Felek Yûsif da zanîn ku 19’ê Tîrmehê ji bo jin roja vejînê bû û wiha got: “Di vê roja pîroz de, morala me her tim bilind bû. Şoreşa 19’ê Tîrmehê şoreşa jin e. Ji ber ku me dîrok baş nas kiribû û desthiladariya li ser jin û civakê baş fêm kiribû, em bi zane bûn û hêza me jî ji vê zanebûnê dihat. Desthilatdariyê maf, ziman, çand û nasnameya me perçiqandinbû, lê di 19’ê Tîrmehê de me wek jin hemû hêza xwe di şoreşa 19’ê Tîrmehê de derxist holê û li dijî desthilardariyê serî hilda.”
‘ÇAWA KU JINÊ DI ŞOREŞA 19’Ê TÎRMEHÊ DE PÊŞENGTÎ KIR, DIVÊ DI ASTA CÎHANÊ DE JÎ PÊŞENGTIYÊ BIKE’
Felek Yûsif got: “Li ser axa Bakur û Rojhilatê Sûriyê piştî derxistina rejîma Baas’ê gel gihiştin mafê xwe û êdî her kesê dest bi axaftina bi zimanê xwe kir. Jin di gelek êrîş û qirkirinan re derbas bûn, lê her tim berxwedana me li hemberî dagirkeriyê berdewam bû. Di roja îro de tevî ku rejîma Baas’ê hilweşiya, lê yê ku hatiye şûna wî heman zihniyeta desthildatdariyê ye. Her tim têkoşîn û berxwedana me li dijî talankirin, qetilkirin û desthilatdariyê wê berdewam be. Em ê her tim li dijî desthilatdariyê têbikoşin. Çawa ku jin di şoreşa 19’ê Tîrmehê de pêşengtî kir, divê di asta cîhanê de jî pêşengtiyê bike.”
Felek Yûsif di dawiya axaftina xwe de şoreşa 19’ê Tîrmehê li Rêber Apo, li gerîlayên serê çiyan, li giyanên şehîdan û li hemû gelên welatparêz û jinê pîroz kir.
