Kongreya Neteweyî ya Kurdistanê (KNK) têkildarî êrişên li ser Başûrê Kurdistanê û hedef girtina mala Serokê Herêma Kurdistanê Nêçîrvan Barzanî, daxuyaniyek belav kir.
Di daxuyaniyê de wiha hate ragihandin: “Em li beramberî hemû êrişên bi drone û mûşekan ên ku bi giştî li ser Başûrê Kurdistanê tên kirin bi fikarin û wan bi tundî şermezar dikin.
Îro ew êriş gihîştin bajarê Dihokê û cihê niştecihbûna birêz Serokê Herêmê Nêçîrvan Barzanî kirin armanc. Ev kiryar bi mebesta li dijî helwesta bêalî ya Herêma Kurdistanê ya di vî şerê heyî de, têkdana ewlehî û derxistina aloziyê ne. Di heman demê de ji bo çandina duberiyê û têkdana bingehên demokrasiya hemû Iraqê ne.
Em bang li hemû hêzên ewlehiyê û aliyên peywendîdar ên Herêm û Iraqê ya Federal dikin ku bi lez derbarê van êrişan bi giştî û bi taybetî jî derbarê hedefgirtina cihê niştecihbûna birêz Serokê Herêmê de lêkolînê bikin, bi dadperwerî sûcdar û kiryaran bigihînin cezayê wan ê yasayî û rê li ber van êrişan bigirin.”
