Ji ber hevdîtina Serokê Meclîsê Nûman Kûrtûlmûş a bi koordînatorên partiyan re, civînê bi derengî destpê kir.
Kûrtûlmûş di axaftina destpêkê de anî ziman ku pêvajo derbasî “demeke gelekî hesas” bûye û destnîşan kir ku komîsyonê qonaxa guhdarîkirinê temam kiriye, êdî derbasî asta amadekirina raporê bûye.
LI GORÎ KÛRTÛLMÛŞ BAZARÎ NÎNE, POLÎTÎKAYA DEWLETÊ YE
Kûrtûlmûş diyar kir ku pêvajo ne tenê bi karên komîsyonê bi rê ve diçe, di heman demê de danûstandinên saziyên pêwendîdar ên dewletê yên li qadê heta niha rol lîstine. Kûrtûlmûş got, “Ev beşeke ji vê meseleyê ye. Ev pevajo weke polîtîkaya dewletê tê meşandin. Saziyên pêwendîdar ên dewletê li qadê û bi rê û rêbazekê bi rêxistinê re didin û distînin û pêvajo gihandine heta vê astê.”
Her wiha bi bîr xist ku piştî fesixkirina PK’Kê û destpêkirina pêvajoya şewitandina çekan a bi merasîmeke sembolîk, partiyên siyasî bi berpirsyariyê rabûn û ev komîsyon hate avakirin.
Kûrtûlmûş anî ziman ku komîsyonê heta niha li 134 kes ûs aziyan guhdarî kir, di 24’ê Mijdarê de nûnerên sê partiyên siyasî çûn Îmrailyê, bi Rêber Apo re hevdîtin kirin û bi vî rengî qonaxa guhdarîkirinê temam kir.
PÊVAJOYA JI NIHA Û PÊ VE
Kûrtûlmûş got, “Di pêvajoya ji niha û pê ve de em derbasî asta amadekirina raporê dibin. Bi amadekirina vê raporê re em ê bi hev re qonaxeke din a gelekî girîng li pey xwe bihêlin û berpirsyariya xwe bi cih bînin.”
Ji ber hesasiyeta pêvajoyê Kûrtûlmûş bang li hemû aliyan kir ku bi baldarî tevbigerin û got, “Tê dîtin, bê pêvajo gihîştiye nuqteyeke çiqasî hesas. Em dikevin pêvajoyeke welê ku her gotina bê gotin, ji dema asayî qat bi qat bêhtir bandorê dike, li ser derdorên mirov li bendê ne yan jî ne li bendê ne bandoreke erênî yan jî neyînî dike. Weke ku pêşiyan gotin, ‘Gotin zîv be, bêdengî zêr e’, divê em sed carî bifikirin, hezar carî bifikirin û hingî biaxivin. Em dikevin pêvajoyeke bi vî rengî (…) Nêrîn û feraseta me ya siyasî ya hemûyan cuda ye, dibe ku aliyê me yê hevpar bêdengbûna çekan a li vî welatî ye.”
Kûrtûlmûş banga berpirsyariyê li çapemeniyê jî kir û anî ziman ku divê pêvajo bi rengê magazînê neyê bikaranîn.
AMADEKARIYA JI BO RAPORÊ DESTPÊ KIR
Kûrtûlmûş diyar kir ku partiyan dest bi pêşkêşkirina raporên xwe ji bo komîsyonê kiriye û got, piştî ku pêvajo temam bû wê raporeke berfireh pêşkêşî meclîsê bê kirin.
Piştî wergirtina pêşniyaran, di beşa duyemîn a civînê de wê serdana Îmraliyê bikeve rojevê.
