Hevserokê Desteya Rêveber a Şengalê Merwan Bedel bi nasnav Dijwar Feqîr ku di 7’ê Kanûna 2021’an de li Xanesorê di encama êrişeke hewayî ya MÎT û Îstîxbarata PDK’ê (Parastin) de şehîd bû, di 4. salvegera şehadeta xwe de li gundê Kersê yê Şengalê bi merasîmekî hate bîranîn.
Merasîma bîranînê li ber mala Şehîd û bi amadebûna şervanên YBŞ’ê YJŞ, nûnerên sazî û rêxistinên civaka Êzidî û gelê herêmê pêk hat.
Merasîma bîranînê bi deqeyek rêzgirtinê ji bo hemû şehîdên azadiyê yên Şengalê destpê kir. Piştre ji aliyê malbata Şehîd Merwan ve mûm hatin pêxistin û axaftin hatin kirin. Di serî de li ser navê fermandariya YBŞ’ê û YJŞ’ê Kurtay Şengalî axivî û da zanîn ku Merwan Bedel di rojeke pîroz a rojiyên Êzî de şehîd bû û got: “Hevalê Dijwar di meheke pîroz de şehîd bû. Ji ber vêya şehîdbûna wî ji bo hemû civaka me pîroze. Em di vê rojê de cejna gelê xwe hemû pîroz dikin. Şehîd Dijwar di xeta me ya YBŞ’ê de jî xwedî helwestekî zelal bû. Ew temsîla hemû civaka me dikir. Şehîd Dijwar ji ber, xwedî hêz û pêşengekî civaka me bû hate hedefgirtin. Hemû civaka Êzidî himbêz dikir. Tu carî hevalê Dijwar ji bo berjewendiyên xwe yên şexsî tev negiriya. Ji bo gelê me canê xwe feda kir. Ji hemû hevalên me ku di nava têkoşînê de ne yê herî zêde zehmetî dît û ked da heval Dijwar bû. Bi berxwedaniya xwe bû egîdekî çiyayê Şengalê. Dema behsa heval Dijwar tê kirin qehremaniya çiyayê Şengalê tê bîra me, ji ber ku wî mohra berxwedaniyê li çiyayê Şengalê da.”
Kurtay Şengalî di dewama axaftina xwe de got: “Bi kedeke mezin gelek şervan perwerde kir. Niha jî Şengal bi saya wan şervanan tê parastin. Her şervanekî ku li ser xeta heval Dijwar be, bi xwe û erka xwe serbilinde. Li ser vî esasî em sersaxiyê ji malbata şehîd û hemû gelê xwe re dixwazin û emê heta dawî li ser xeta şehîd bin.”
Li ser navê Malbatê jî Hilwa Feqîr axivî û got: “Di serî de em di şexsê hevalê Dijwar de hemû şehîdên têkoşîna azadiyê bi rêzdarî bibîrtînin. Şehîd Dijwar ku kesekî bi tenê bû li nava malbatê de hemû jiyana xwe ji bo parastina vî gelî veqetandibû. Ji bo gel pêşengî kir û bibû malê hemû civakê. Ji ber xwedî sekin û bi biryar bû lewma hate hedefgirtin. Lê em dibînin niha bi sedan şervanên YBŞ û YJŞ’ê hene li ser xeta hevalê Dijwar û hemû şehîdan têkoşîn dikin. Şehîd Dijwar herdem li peyî tolhildana keç û jinên Êzidî yên ku ketine destê DAIŞ’ê de bû. Em wek malbat jî çawa me ji xwe re Şehîd Dijwar mîna pêşengekî didît, em îro YBŞ û YJŞ’ê jî wisa dibînin. Ji ber ku ew jî hemû ji bo gihandina xewn û xeyalên şehîdan têkoşîn dikin. Em soz didin emê dest ji têkoşîna xwe ya ji bo gihandina xeyalên şehîdan bernedin û heya dawî emê li ser vê rêyê bin.”
Piştî axaftinan, Rojnivîska Şehîd Dijwar ku mîna sînevîzyon hate amadekirin, hate pêşandan û merasîm bi dirûşmeyên Şehîd Namirin bi dawî bû.
Hêjayî gotinê ye ji ber ku Şehîd Merwan Bedel di roja yekemîn a Cejna rojiyên Êzî de şehîd bibû, lewma her sal ji aliyê malbatê û civaka Êzidî ve, beriya salvegera ku roja têde şehîd ketiye tê bibîranîn.
