Konferansa Ronakbiriyê ku di 17’ê Tîrmehê de li Şengalê hat lidar xistin, piştî pêşketinên dawî yên li herêmê, ji bo civaka Êzidî hem ji hêla sembolîk ve û hem jî ji hêla pratîkî ve, gaveke girîng hat dîtin. Rêveberî, akademîsyen, rêxistinên jinan û nûnerên civaka sivîl ên beşdarî konferansê bûne, banga xwedîderketin û berfirehkirina têkoşîna hevpar a gelê Êzidî kirin. Di konferansê de gelek mijarên mîna siberoja Şengalê, rola pêşengiya jinan û mîrata berxwedanê ya civaka Êzidî hate destgirtin. Di heman demê de silav û peyamên Rêber Apo jî di konferansê de rastî eleqeyek mezin hat.
DENGÊ ÊZIDIYAN LI CÎHANÊ HAT BIHÎSTIN
Cîgirê Hevserokê Meclîsa Xweseriya Demokratîk a Şengalê (MXDŞ) Hisên Seado, diyar kir ku bi wesîleya konferansa Ronakbiriyê dengê Êzidiyan gihiştiye hemû cîhanê. Seado, anî ziman ku kombûna beşdaran ji seranserê Iraqê ne bûyerek jirêzê bû û got ku bingehek watedar ji bo yekîtiya civaka Êzidî ava kir. Seado, destnîşan kir ku Rêber Apo peyamek taybet ji konferansê re şandiye û got ku gelê Êzidî ji bîr nekiriye. Seado, destnîşan kir ku kombûnên wiha ji bo rêxistinkirina civakê û şekildana siberojê wê pir girîng bin.
JINÊN ÊZIDÎ PÊŞENGIYA PÊŞVEÇÛNÊ DIKIN
Endama Weqfa Jinên Ereb a Bexdayê Kerîma El-Saedî, destnîşan kir ku ev konferans di têkoşîna jinan de gaveke dîrokî bû. Kerîma El-Saedî, diyar kir ku jinên Êzidî, tevî êşên mezin ên ku kişandine, îro di her qadê de pêşengiyê dikin û got ku ev berxwedan ji bo hemû jinên li Iraqê dijîn dibe çavkaniya îlhamê. Kerîma El-Saedî, beşdarbûna xwe ya di konferansê de wekî “şansek” bi nav kir û diyar kir ku ev kombûn derfeteke girîng pêşkêş kir da ku civaka Êzidî çêtir were fêmkirin.
BER BI RONESANSEKE NÛ HEVGIRTIN Û XWE PARASTIN
Endamê Rêveberiya Xweser a Şengalê Xwedêda Eliyas, jî diyar kir ku konferans ne tenê platformek ji bo nîqaşê ji bo civaka Êzidî ye, di heman demê de destpêka pêvajoyek ji nû ve avakirinê ye. Xwedêda Eliyas, anî ziman ku tevî hemû fermanên ku gelê Êzidî rast hatine jî, ew teslîm nebûne, ji rabûrdûyê xwe encam derxistine û niha di nava yekîtiyek de xwedî îradeya avakirina siberoja xwe ne. Xwedêda Eliyas got, “Ger civaka Êzidî yekgirtî be, kes nikare wê têk bibe. Ger em weke civaka Êzidî xwe li ser van hîman xurt bikin, helbet em ê ber bi ronesansê ve herin û ji tevahiya cîhanê re bibin mînak.”
Konferansa Ronakbîrî ya Şengalê ne tenê platformek ji bo nîqaşkirina pirsgirêk û siberoja civaka Êzidî bû, di heman demê de peyamek zelal da ku Êzidî bi yekgirtî û bi îradeya xwe ya azad ber bi siberojeke geştir ve biçin.
