Hevseroka Giştî ya Partiyan a Herêman a Demokratîk Çîgdem Kiliçgun Ûçar di konferansa “Kurdên Bakur yekîtiya neteweyî nîqaş dikin” axivî û di têkoşîna azadiyê ya Kurdan de bal kişand ser girîngiya avakirina hiqûqa hevpar û yekîtiyê.
Çîgdem Kiliçgun Ûçar girîngiya zimanê Kurdî destnîşan kir û ragihand ku axaftina bi zimanê dayikê destketiyekî têkoşîna azadiyê ye. Çîgdem Kiliçgun Ûçar diyar kir ku têkoşîna Kurdan bingeha yekîtiya neteweyî daniye û got, ev yekîtî divê demokratîk û tevgir be.
Hevseroka Giştî ya DBP’ê di dewama axaftina xwe de ragihand ku li ge nêrînên cuda jî di mijara azadiya gelê Kurd de zemîneke hevpar ava bûye.
Çîgdem Kiliçgun Ûçar diyar kir ku şerê li Kurdistanê ji ber polîtîkayên asîmîlasyon û înkarê ne û got, “Divê em êdî li ser rê û rêbazên avakirina azadiyê biaxivin.”
Çîgdem Kiliçgun Ûçar bi dewamî ragihand ku Kurd di nava hiqûqa heyî ya dewletê de nîne, lewma divê hiqûqa xwe ya navxweyî ava bikin û got, “Em di nava hiqûqa dewletê de nînin. Ji ber vê jî têne girtin, neçar dimînin ku xaka xwe biterikînin. Pêwîstiya me bi hiqûqekê heye. Ew jî hiqûqa navxweyî ya Kurdan e. Hiqûqa me ya navxweyî jî nîne.”
Hevseroka Giştî ya DBP’ê got, “Eger em nikaribin di nava xwe de hiqûqeke demokratîk ava nekin, em ê nikaribin bi dewletê re jî nîqaşeke hiqûqî bikin.”
Çîgdem Kiliçgun Ûçar berxwedana li Rojava weke mînak nîşan da, banga yekîtiyê dubare kir û anî ziman ku Kurd li dijî parçebûnê divê bi hev re tevbigerin.
Çîgdem Kiliçgun Ûçar di dawiya axaftina xwe de bang kir ku dewlet bi raboriyê re rûbirû bibe û wiha dawî li gotinên xwe anî: “Me her tişt dît, lê me tenê azadî nedît. Niha di têkoşîna azadiyê de tevgera Kurd û Birêz Ocalan rêbertiyê dikin. Her kesê ku paradigmaya Birêz Ocalan qebûl dike, di heman demê de rêbertiya vê têkoşînê jî dike. Bi felsefeya ‘Jin, Jiyan, Azadî’ em ê demokrasî û aştiyê ava bikin.”
Piştî axaftina Ûçar, beşdarên din ên konferansê jî dîtinên xwe parve kirin. Halîm Îpek da zanîn ku ji Peymana Qesrî Şîrîn heta roja îro yekîtî derdê sereke ye û wiha axivî: “Yekîtî di nava gelê Kurd de heye û gel vê helwestê jî nîşan dide. Lê partiyên siyasî yên Kurd nayên cem hev. Divê partiyên siyasî bi berpirsyarî tevbigerin.”
Ohannas Gafur Ohannîan jî bal kişand ser Komkujiya Ermeniyan û wiha axivî: “Milyonek û nîv Ermenî li ser vê axê hatin qetilkirin, rastî destdirêjiyê hatin û hatin koçberkirin. Ev gelê qedîm îro li ber tunebûnê ye. Ez li ber bîranîna wan bejna xwe bi rêzdarî ditewînim. Heke yekîtiya neteweyî pêk neyê, wekî berê dê dîsa me bi hev bidin qirkirin.”
Doktor Xelîl jî destnîşan kir ku her çiqas serkeftin nêzîk dibe, astengî jî ewqas zêde dibin û got ku welatê Kurdan Kurdistan e. Doktor Xelîl axaftina xwe wiha domand: “Behsa Komkujiya Ermeniyan hat kirin; bi milyonan mirov ji gelek neteweyên cuda hatin kuştin. Heke em yekîtiya xwe ava nekin, dê dîsa bi milyonan mirov bimirin. Ji bo vê yekê, mîsoger e ku em yekîtiya xwe ava bikin.”
Piştî axaftinan sînevîzyonek têkildarî yekîtiya neteweyî hate nîşan dan. Piştî nîşandana sînevîzyonê, konferans ji çapemeniyê re girtî berdewam kir.
