Dîwana Hevserokatiyê ya KONGRA-GEL bi daxuyaniyeke nivîskî diyar kir ku dema azadiya Rêber Apo hatiye û got, 8’ê Mijdarê wê li Kolnê ‘dîrokeke nû bê nivîsandin’.
Di daxuyaniyê de ev tişt hatin diyarkirin: “Banga Rêber Apo ya ‘Aştî û civaka demokratîk’ meha xwe ya 8’an temam kir, ket meha 9’an. Di vê pêvajoyê de Tevgera Azadiyê li ser bingehê bersiva bangê, gelek gavên girîng avêtin. PKK’ê di Kongreya xwe ya 12’an de biryara fesixê da. Ji bo pêşketina pêvajoyê bi pêşengiya Hevseroka KCK’ê heval Besê Hozat komeke gerîla çekên xwe şewitandin. Û bi armanca tunekirina îhtîmalên provakasyonên li hemberî pêvajoyê, gerîla ji qadên ku xeteriya şer lê hene vekişiyan û li ser navê gerîlayan Tevgera Azadiyê bi daxuyaniya çapemeniyê gaveke din a pir girîng avêt.
Rêber Apo bi pêşbînî û cesareteke bêhempa li ser navê aştî û demokrasiyê rol girt ser xwe. Lê belê tevî van hemûyan, bersiva ji bo van gavên dîrokî zêde têrker nebû.
Komîsyona ku ji aliyê meclîsê ve têkildarî pêvajoyê hate avakirin, di çarçoveya plansaziyekê de li gel ku bi gelek derdoran re hevdîtin kir, bi Rêber Apo re ku muzakerevanê sereke ye heta niha hevdîtin nekiriye. Pêkanîna hevdîtinê bi xwe bûye mijara nîqaşê ku ev yek ji ber kêmasiya hikumeta AKP’ê ya têkildarî pêvajoyê ye.
Li pêşberî tabloya şer û biçekbûna zêde ku krîza modernîteya kapîtalîst li cîhanê bûye sedema wê, Rêber Apo bi banga ‘Aştî û civaka demokratîk’ ji bo pirsgirêka Kurd û hemû pirsgirêkên neteweyî û civakî derfetê çareseriya alternatîf afirand. Şert û mercên kar û jiyana azad ên Rêber Apo ji bo gelên Rojhilata Navîn û dostên me yên navneteweyî rojeva bingehîn e.
Di çarçoveya kampanya “Azadî ji Rêber Apo re, çareseriya demokratîk ji pirsgirêka Kurd re” ya bi pêşengiya dostên me di qada navneteweyî de tê meşandin, wê 8’ê Mijdarê li Kolnê meş û mîtîngek bê lidarxistin. Meş û mîtîng ji bo xwedîderketina li Rêber Apo û bilindkirina daxwaza azadiyê firsendeke mezin e.
Gelek kesayetên girîng ên li qada navneteweyî naskirî ne û di nava kampanya “Azadî ji Rêber Apo re” cih digirin, wê 8’ê Mijdarê li Kolnê di mîtîngê de bin. Wê rojê bala cîhanê wê li ser Kolnê be. Ji ber vê yekê jî divê gelê me û dostên me bi ruhê seferberiyê biherikin Kolnê.
Gelê me yê welatparêz û dostên me yên enternasyonal ên ku pêngavên mezin pêk anîn, em ji dil bawer dikin ku wê di 8’ê Mijdarê de jî li Kolnê dîrokeke nû binivîsînin. Li ser vê bingehê di serî de jin û ciwan divê her kes derdora xwe bi rêxistin bike û bi rengekî girseyî tevlî mîtîngê bike.
Dem dema azadiya Rêber Apo ye. 8’ê Mijdarê wê li Kolnê dîrokeke nû bê nivîsandin. Em bang li gelê xwe û dostên xwe dikin ku bi tevlî govenda azadiyê bibin ku wê bi sed hezaran kesî bê gerandin.”
