Komîteya TêkilÎ û Tifaqên Demokratîk a Kongra Star Kongra Star a Rojava, têkildarî şer û binpêkirinên li dijî jin û gelê El-Faşêr û Sûdanê tên jiyîn, li bajarê Qamişlo yê Bakur û Rojhilatê Sûriyeyê daxuyanî da.
Daxuyanî ji aliyê berdevka Komîteya Têkilî û Tifaqên Demokratîk a Kongra Star Ronahî Hesen ve hat xwendin.
Daxuyaniya Kongra Star wiha ye;
“Em weke jinên têkoşer ên Rojava/Bakur û Rojhilatê Sûriyeyê, îro bi awayekî dilê me tijî xemgînî û êş dengê xwe bilind dikin. Em hevgirtina xwe ya bi hemû jinên li Sûdanê re radigihînin û bi taybetî jinên li El Faşêrê dijîn bi bîr tînin; ji ber ku ew di bin şert û mercên tirsnak ên tundiya herî hovane, kuştin, tecawiza bi pergalî, girtina kêfî, windakirina bi zorê û koçberkirina bi hezaran kesan de jiyana xwe didomînin.
Tiştên li El Faşêrê li dijî jinan tên kirin ne tenê êrîşek e, sûcek li dijî mirovahî û tunekirina bi zanebûn a jinan e. Ev yek êrîşeke rasterast e, li dijî hemû civakên ku daxwaza azadî û edaletê dikin. Êşa we êşa me ye; em tirs û bêhêvîtiya we parve dikin. Cîhan nikare bêdeng bimîne; divê dengê we bê bihîstin û bêedaletî êdî gef li jiyana xwe nexwe.
Em bawer dikin ku jin dil û mêjiyê civakê ne; azadî û serxwebûna jinan bingeha civakek azad û adil e. Di bin şert û mercên zehmet ên jinên li El Faşêrê dijîn de, hem erka we û hem jî erka hemû jinên azad ew e ku xwe û hebûna xwe biparêzin. Parastin tenê bi bawerkirina kesên din mîsoger nabe; bi mîsogerkirina tedbîrên şênber ên mîna avakirina rêxistinên jinan ên bihêz, li hevanîna hemû jinên li her taxa bajar û gundan, avakirina qadên ewle, belgekirin, çavdêrîkirin û piştgiriya derûnî û madî ya ji bo mexdûran, wê pêkan bibe. Birêxistinbûna jinan a di nava rêxistinên civakî û jinan de ne vebijarkek e; li hemberî bêedaletî û zulmê, riya domandina jiyana bi rûmet e.
Têkoşîna jinan a li dijî dagirkerî, tundî û otorîterîzmê nikare takekesî be; ew yek têkoşîneke kolektîf e ku divê jin li her qadê bibin yek û li dijî neheqiyê bi dengekî hevpar bisekinin. Her êrîşa li dijî jinan, êrîşeke li ser tevahiya civakê ye. Gavên jinan ên parastina xwe û rêxistinkirina civakên xwe, gavên di riya azadî, rûmet û edaletê de tên avêtin in.
Em bi felsefeya “Jin, Jiyan, Azadî” re radigihînin ku êşa jinên Sûdanê dikşînin, êşeke gerdûnî ye. Berpirsyariya hemû jinên azad ên cîhanê ew e ku li kêleka wan bisekinin, dengê wan bilind bikin û civaka navneteweyî neçar bikin ku tedbîrên lezgîn bigre.
em îro dengê xwe ji civaka navneteweyî û rêxistinên mafên mirovan re bilind dikin. Em daxwaza bidawîanîna şerê li dijî jinên li El Faşêrê û hemû jinên li Sûdanê û rawestandina hemû cureyên tundiyê dikin. Divê qîrîna jinan bê bihîstin, jiyan û rûmeta wan bê parastin, stargehek bi ewle, piştgiriya tenduristî û derûnî ya lezgîn bê mîsogerkirin û alîkariya mirovî bêyî derengmayîn û astengkirinê ji hemû herêmên bi bandor bûne re bê şandin.
Her wiha em daxwaz dikin ku lêpirsînek navneteweyî ya serbixwe û zelal bê vekirin ku sûcdar hesab bidin û binpêkirinên mafên jinan bê ceza nemînin. Em girîngiya piştgiriya însiyatîfên jinên herêmî, misogerkirina beşdariya çalak a jinan a di pêvajoyên biryargirtinê de û ji nû ve avakirina civakê ya li ser bingehên edalet û wekheviyê tekez dikin. Bi vî yekê dê dawî li tundiyê bê anîn, aştiyeke rastîn û berfireh bê mîsogerkirin; wê jin bên parastin û hemû kesên di civakê de jiyana azad û bi rûmet bijîn.
Em weke Kongra Star, bawer dikin ku têkoşîna jinên Sûdanê ya ji bo mafê jiyanê û rûmeta mirovan, têkoşîna hemû jinên azad ên li seranserê cîhanê ye. Hevgirtina bi wan re, ne hesteke demkî ye; berpirsyariyeke exlaqî, mirovî û kolektîf e. Em radigihînin ku em bi we re ne, em êşa we parve dikin û em ê dengê we bigihîjînin tevahiya cîhanê. Têkoşîna we têkoşîna me ye; rûmeta we rûmeta me ye. Yekîtî, rêxistin û hêza xweparastinê, hêza rast e dê azadî û edaletê misoger bike. Kongra Star, di riya avakirina civakek bê tund û zextan û wekhevî, ewlehî û serxwebûnê mîsoger dike de, li kêleka jinan e û dê parastina felsefeya “Jin, Jiyan, Azadî” didomîne.”
