Meclisa Jinan a Tevgera Civaka Demokratîk (TEV-DEM) bi dirûşma “Jina birêxistinkirî garantiya avakirina civaka demokratîk e” kongreya xwe ya yekemîn bi beşdariya 375 delgeyan li bajarê Hesekê yê kantona Cizîrê li dar dixe.
Di kongreya de endamên jinên yên di saziyên Rêveberiya Xweser, Meclisa Kombûna Zenûbiya û Kongra Star amade ne.
Piştî deqeyeke rêzgirtinê hevseroka TEV-DEM’ê Remziyê Mihemed axivî. Remziyê di destpêka axaftina xwe de damezirandina vê kongreyê li tevahî jinên têkoşer û jinên canê xwe feda kirin û şehîdên Bendava Tişrînê pîroz kir û wiha got: “Rengê ku jinan li şoreşê daye dikar di siberojê de bibe mîrateyek dîrokê. Me bi hezaran şehîd dan û di dilê me de dijîn. Pengava ku Rêber Abdullah Ocalan daye dest pêkirin divê em temam bikin û banga aştiyê bi ser bixin. Divê jinên li Bakur û Rojhilata Sûriyeyê tecrubeyên xwe li tevahî Rojhilata Navîn belav bikin.”
Dûre rewşa siyasî ji hêla endama Desteya Hevserokatiya Partiya Yekitiya Demokratîk (PYD) Foza Yûsif ve hate şîrovekirin.
Foza Yûsif li ser rewşa siyaysî ya giştî Sûriyeyê, aloziya li peravê û sûcên li dijî jinan têne kirin nirxandin kir û got divê li hemberî van sûcan bêdengî nebe.
Foza Yûsif bal kişand ser rewşa Bakur û Rojhilatê Sûriyeyê jî û bi bîr xist ku parastin û ewlehiya heyî bi saya şervanên YPJ’ê, Asayîşa Jinan û Hêzên Parastina Civakî (HPC) hatiye mîsogerkirin.
Foza îşaret bi banga Aştî û Civaka Demokratîk a Rêber Abdullah Ocalan jî kir û diyar kir ku divê piştevaniya bangê bê kirin da ku tevahî pirsgirêk û şerê heyî bi dawî bibe.
Foza Yûsif wiha behsa tayînkirina kujerê Hevrîn Xelef wekî fermandarekî yekîneyeke girêdayî desthilata Şamî jî kir û ev li gotinên xwe zêde kir: “Doza Hevrîn Xelef doza me ye, heya kesên sûcdar neyê dazirandin wê têkoşîn me berdewam bike.”
Endama Desteya Hevserokatiya PYD’ê Foza Yûsif di dawiya axaftina xwe de wiha got: “Gavên girîng tên avêtin, bi rastî bi pêşketina vê pêvajoyê re divê hêza jinan li derdore wê kom bibe û wê bi ser bixe.”
Endama Koordînasyona Kongra Star Bêrîvan Xalid jî lidarxistina vê kongreyê li jinên di nava Tevgera Civaka Demokratîk de cih digirin û li tevahî şehîdan pîroz dikin û got: “Îro roja mîrateyaa têkoşîna jinan ne. Jin pêşengtiya şoreşa Rojava kir û rola xwe ya serek didomîne. Bi felesefeya Jin Jiyan Azadî em gihiştin vê rojê. Jinan pêşengtî di tevahî saziyan de kir û xebat bi rêve dibin. Di vê demê hesas de li Sûriyeyê û Rojhilata Navîn, em ê bi serkevin. Desthildariya Şamê jî mejiya xwe ya desthildarî û nîjadperestî ya li ser jinan wê negihêjê tu armancî. Peyama me jî wê em ê têkoşîna xwe berdewam bikin heya ku demokrasî pêk tê. Bi vîna jinan wê têkoşîn me bibe bersiv. Bi avakirina vê meclisê re wê gavên xurttir bê avêtin.”
Endama Meclisa Jinan a Meclisa Malbatên Şehîdan Cewahir Osman jî axivî û anî ziman ku jin dikarin bi vîna xwe hemî zîhniyeta bavksalarî biguherînin û wiha got: “Me ji cîhanê de îsbat kir ku em bi hêz in û bi hêza jinan wê serkeftin misoger bibe.”
Kongre bi xwendina rêziknamê û prespektîfan dewam dike.
