Li gorî raporê, Rûsyayê di şerê Ûkraynayê de herî kêm 27 hezar şervanên biyanî şandine eniyên şerî. Hate îfadekirin ev pêvajoya kesên ji zêdetirî 130 welatan hatine daxilkirin, stratejiyeke ‘’sîstematîk û sazîbûnê’’ ye.
Rapora ku xwe dispêre lêkolîna neh mehan, nîşan dide ku Rûsya bi taybetî komên lawaz ên weke koçber, xwendekar, girtî û xebatkarên bêtemînat hedef digire.
Serokê FIDH’ê Alexis Deswaef, diyar kir ku beşeke ji van kesan hatine xapandin û got: ‘’Dewlet van însanan dike parçeyekî makîneya şerî û dişîne eniyên herî talûke.’’
Li gorî raporê Rûsya ji koçberên ji Asyaya Navîn re li şûna ku wan dersînor bike yan jî bigire peymanên leşkerî pêşkêş dike.
JI SEDÎ 20’Ê WAN DI ÇAR MEHÊN EWIL DE MIRINE
Raporê destnîşan kir ku windahiyên li qadê jî zêde ne û hate diyarkirin ku bi qasî ji sedî 20’ê van şervanan di nava çar mehên ewil de jiyana xwe ji dest dane. Hin şahidan jî dan zanîn ku ew bi miameleya xirab û biçûkxistinê re rû bi rû mane.
Raporê îfade kir ku ev sepan li dijî hiqûqa navneteweyî ne û bang hate kirin ku têgeha leşkerên bimeaş were nûkirin, yasayên li dijî bazirganiya mirovan werin berfirehkirin û mekanîzmayên veguherîna biyaniyên ku di şerî de tên bikaranîn werin avakirin
